Маңғыстауда Instagram арқылы тауар сату кезінде жасалған алаяқтық дерегі бойынша қылмыстық іс тергелуде, деп хабарлайды kazlenta.kz тілшісі Polisia.kz сайтына сілтеме жасап.
Маңғыстау облысының полиция департаменті Instagram әлеуметтік желісі арқылы жасалған алаяқтық дерегі бойынша тергеу жүргізіп жатыр. Қылмыстық іс материалдарына сәйкес, күдікті әлеуметтік желіде Қытайдан түрлі тауарларды, оның ішінде премиум санаттағы ыдыс-аяқтар мен тұрмыстық техниканы нарықтық бағадан едәуір төмен бағамен сату және жеткізу туралы жарнамалар орналастырған. Тауарларды жарнамалау үшін 360 мыңнан астам оқырманы бар танымал Instagram аккаунтының иесі тартылған. Тергеу нұсқасы бойынша, жарияланымдар арқылы әлеуетті сатып алушыларға тауардың бар екені, оның сапасы және Қазақстанға жеткізу мүмкіндігі туралы ақпарат берілген.
Жарнама жарияланғаннан кейін азаматтар көрсетілген байланыс нөмірлері арқылы хабарласып, тауарлар үшін жеке кәсіпкердің шотына ақша аударған. Алайда тауарларды жеткізу бойынша қабылданған міндеттемелер орындалмаған. Тергеу деректеріне сәйкес, алынған қаражат жеке мақсаттарға жұмсалған. Тергеу барысында ыдыс-аяқ пен тұрмыстық техника үшін ақша аударған жәбірленушілер анықталды. Аталған дерек бойынша Қазақстан Республикасы Қылмыстық кодексінің 190-бабымен (алаяқтық) қылмыстық іс қозғалды. Күдіктілер ұсталып, уақытша ұстау изоляторына қамалды. Қазіргі уақытта оқиғаның барлық мән-жайларын анықтау, сондай-ақ өзге де ықтимал жәбірленушілерді анықтау жұмыстары жүргізіліп жатыр. Полиция азаматтарды әлеуметтік желілер арқылы тауар сатып алу кезінде сақ болуға, сатушылар туралы мәліметтерді мұқият тексеруге және күмәнді шоттарға ақша аудармауға шақырады. Тергеу мүддесіне байланысты өзге ақпарат жария етілмейді.