Абай облысында отбасылық жанжал тудырған азамат 300 сағат қоғамдық жұмысқа тартылды, деп хабарлайды kazlenta.kz тілшісі Polisia.kz сайтына сілтеме жасап.
Семей қаласының тұрғыны отбасылық жанжал кезінде жұбайының денсаулығына орташа ауырлықтағы зиян келтіргені үшін сот үкімімен 300 сағат қоғамдық жұмыс түріндегі жазаға тартылды. Сотталған азамат Семей қаласы Затон ауданының пробация қызметіне есепке қойылды. Есепке қою барысында пробация қызметінің мамандары сотталған азаматпен профилактикалық және түсіндіру жұмыстарын жүргізіп, жазаны өтеу тәртібін түсіндірді. Сонымен қатар қоғамдық жұмыстарды орындау талаптары және жазаны өтеуден жалтарған жағдайда көзделген жауаптылық ескертілді. Пробация қызметі сотталған азаматтың жазаны белгіленген тәртіппен өтеуін бақылаумен қатар, оның құқық бұзушылыққа әкелген себептерін түсінуіне және алдағы уақытта қайталап құқық бұзушылық жасамауына бағытталған профилактикалық жұмыстар жүргізуде.
Семей қаласы Затон ауданының пробация қызметінің бастығы Ерик Усербаевтың айтуынша, пробация қызметінің негізгі міндеттерінің бірі — сотталғандардың жазаны орындауын бақылаумен қатар, олардың мінез-құлқына оң ықпал ету және қайта құқық бұзушылық жасауына жол бермеу.
Пробация қызметінің профилактикалық жұмысы сотталғандардың қоғамға қайта бейімделуіне, құқыққа қайшы әрекеттердің қайталануына жол бермеуге және отбасылық-тұрмыстық жанжалдардың алдын алуға бағытталған.