Абай облысында жүйелі түрде құқық бұзушылық жасаған есептегі сотталған бас бостандығынан айырылды, деп хабарлайды kazlenta.kz тілшісі Polisia.kz сайтына сілтеме жасап.
Абай облысының 35 жастағы тұрғыны ұрлық жасағаны үшін екі жылға бас бостандығын шектеу жазасына сотталған. Жазасын әрі қарай өтеу үшін әйел Абай облысы бойынша ҚАЖ пробация қызметінің есебіне қойылды. Есепке қою барысында пробация қызметінің мамандары сотталған әйелге жазаны өтеу тәртібі мен шарттарын, оның міндеттерін түсіндіріп, белгіленген талаптарды орындамаған жағдайда жауапкершілікке тартылатынын ескертті. Алайда бірнеше рет ескерту жасалғанына қарамастан, әйел белгіленген талаптарды жүйелі түрде бұзған.
Тексеру кезінде тұрғылықты мекенжайында болмаған, алкогольдік ішімдік ішкен және қоғамдық тәртіпті бұзған. Сонымен қатар бала тәрбиесі жөніндегі міндеттерін тиісінше орындамағаны үшін әкімшілік жауапкершілікке тартылған. Жүйелі түрде тәртіп бұзуына байланысты пробация қызметі сотқа жүгінді. Сот шешімімен бас бостандығын шектеу түріндегі жаза бас бостандығынан айыру жазасына ауыстырылды. Өтелмеген жаза мерзімі екі жыл бір айды құрады. Бұл ретте сот сотталған әйелдің отбасылық жағдайын, атап айтқанда, оның 15, 11, 8, 5, 4 және 2 жастағы алты кәмелетке толмаған баласының бар екенін ескерді. Бас бостандығынан айыру түріндегі жазаны орындау екі жыл мерзімге кейінге қалдырылды.
Әйел қайтадан пробация қызметінің есебіне қойылды. Оған жазаны орындау тәртібі қайта түсіндіріліп, кейінге қалдыру шарттары сақталмаған және құқық бұзушылықтар жасалған жағдайда жазаны кейінге қалдырудың күші жойылып, бас бостандығынан айыру жазасы орындалатыны ескертілді. Алайда осыдан кейін де сотталған әйел белгіленген талаптарды бұзуды жалғастырды. Нәтижесінде жазаны өтеу тәртібі өзгертіліп, оған 11 ай мерзімге бас бостандығынан айыру жазасы тағайындалды.
- Пробация қызметі сотталғандарға бақылау жүргізіп қана қоймай, оларды қалыпты өмірге қайтаруға бағытталған әлеуметтік-құқықтық көмек көрсетеді. Бұл жағдайда әйелге қоғамнан оқшауланбай, өз мінез-құлқын түзетуге екі рет мүмкіндік берілді. Оған барлық талаптар мен оларды бұзудың салдары түсіндірілді. Өкінішке қарай, сотталған әйел тиісті қорытынды жасамай, белгіленген талаптарды бұзуды жалғастырды, – деп атап өтті Курчатов қаласы пробация қызметінің аға инспекторы Назым Тохтар.