Атырауда саябақта жалғыз жүрген бүлдіршін полицейдің көмегімен ата-анасына қайтарылды, - деп хабарлайды kazlenta.kz тілшісі Polisia.kz сайтына сілтеме жасап.
16 тамыз күні таңғы сағат 07:25 шамасында Атырау қаласындағы саябақта серуендеп жүрген тұрғын жалғыз жүрген кішкентай баланы байқайды. Бүлдіршіннің жанында ата-анасы да, өзге жақындары да болмаған. Жағдайға алаңдаған азамат бірден "102" арнасына хабарласқан. Шақырту түскен бойда оқиға орнына патрульдік полиция қызметкері Сұлтан Сапарғалиев жедел аттанды. Полицей небәрі 10 минут ішінде саябаққа жетіп, үш жастағы баланың қауіпсіздігін қамтамасыз етті. Бейтаныс ортада жалғыз қалған бүлдіршінге ең алдымен қамқорлық пен жылы қарым-қатынас қажет еді.
Тәртіп сақшысы баламен тіл табысып, оның көңілін аулап, өзін қауіпсіз сезінуіне жағдай жасады. Осы уақытта полиция қызметкерлері баланың ата-анасын анықтау жұмыстарын жүргізді. Көп ұзамай бүлдіршіннің анасы анықталып, бала аман-есен заңды өкіліне табысталды. Бір қарағанда, бұл таңғы уақытта саябақта болған қарапайым жағдай секілді көрінуі мүмкін. Алайда кішкентай баланың қараусыз қалуы кез келген сәтте қайғылы жағдайға әкелуі ықтимал. Осы ретте тұрғынның бейжай қалмай, дер кезінде полицияға хабарласуы және тәртіп сақшысының жедел әрекеті ықтимал қауіптің алдын алуға мүмкіндік берді. Бұл жағдай бала қауіпсіздігіне келгенде әр минуттың маңызды екенін тағы бір мәрте көрсетті. Полиция ата-аналарды кішкентай балаларын қараусыз қалдырмауға, олардың жүрген жерін үнемі бақылауда ұстауға шақырады. Ал көшеде жалғыз жүрген немесе көмекке мұқтаж баланы байқасаңыз, бейжай қалмай, дереу "102" арнасына хабарлаңыз. Кейде бір ғана қоңырау баланың қауіпсіздігін қамтамасыз етуге жеткілікті.