Ақтөбе облысында туристік қызмет көрсету сылтауымен жасалған алаяқтық фактісі бойынша сотқа дейінгі тергеп-тексеру жүргізілуде, - деп хабарлайды kazlenta.kz тілшісі Polisia.kz сайтына сілтеме жасап.
Тергеу мәліметтеріне сәйкес, туристік компаниялардың бірінің өкілдері 200-ден астам азаматтан шетелге және демалыс орындарына туристік сапарларды ұйымдастыру үшін алдын ала ақша алған. Алайда уәде етілген қызметтер – жолдамаларды рәсімдеу, қонақүйді брондау және әуе билеттерін сатып алу – орындалмаған. Соның салдарынан көптеген тұрғынның жоспарлаған жазғы демалысы жүзеге аспай қалған. Қазіргі уақытта полиция қызметкерлері істің барлық мән-жайын жан-жақты анықтап, жәбірленушілердің нақты санын және келтірілген материалдық шығын көлемін есептеуде.
Ақтөбе облысы полиция департаменті жазғы демалыс маусымында туристік компаниялардың атын жамылған алаяқтардың белсенді әрекет ететінін ескертеді. Әдетте олар нарықтағы бағадан әлдеқайда арзан турларды ұсынып, төлемді шұғыл аударуды талап етеді. Қаражатты алғаннан кейін байланысқа шықпай, өз міндеттемелерін орындамайды. Осыған байланысты полиция азаматтарға туристік қызметті сатып алмас бұрын компанияның іскерлік беделін, қызмет көрсетуге құқық беретін құжаттарының болуын және клиенттердің пікірлерін мұқият тексеруге кеңес береді. Сондай-ақ міндетті түрде ресми келісімшарт жасап, төлемдерді тек компанияның расталған банктік реквизиттері арқылы жүргізу қажет. Егер сіз осындай алаяқтықтың құрбаны болсаңыз немесе күмәнді жағдайларға тап болсаңыз, уақыт оздырмай полицияға хабарласыңыз.