Үрімжі қаласында 25 маусымда басталған «Қытай – Еуразия» IX халықаралық көрмесі аясында «Қытайға экспорт» форумы өтті. Форум барысында Майлы дақылдарды қайта өңдеушілердің ұлттық қауымдастығы (МДҚӨҰҚ) Қытай нарығына май өңдеу өнімдерінің экспортын дамыту перспективаларын таныстырды.
Іс шарада қазақстандық өнімдердің, атап айтқанда өсімдік майлары мен жоғары ақуызды мал азығының (шрот пен күнжараның) экспорттық жеткізілімдерін ұлғайту мүмкіндіктері талқыланды. Қауымдастық өкілдері Қытай нарығының әлеуеті жоғары екенін атап өтіп, жақын және орта мерзімді кезеңге арналған жоспарларын ортаға салды.
Олардың мәліметінше, ағымдағы маусымның сегіз айында Қытайға өсімдік майлары мен шрот/күнжара экспорты 95%-ға өсіп, 480 мың тоннаны құрады. Экспорттың жалпы құны 326 млн АҚШ долларына жетті.
«Бұл көрсеткіш май өңдеу өнімдеріне сұраныстың тұрақты өсіп келе жатқанын және Қазақстан мен Қытай арасындағы сауда-экономикалық ынтымақтастықтың тереңдей түскенін айғақтайды. Осыған байланысты 2025-2026 маусымында Қытайға өсімдік майлары мен шрот/күнжара экспортының көлемі 700 мың тоннаға дейін жетеді деп болжап отырмыз. Бұл – 2024-2025 маркетингтік жылмен салыстырғанда екі есе көп», – деді аталған қауымдастық өкілі.
Қазіргі таңда Қазақстан Қытай нарығына күнбағыс майын жеткізуші елдер арасында екінші орында тұр. Сонымен қатар еліміз Қытайға күнбағыс шротын экспорттайтын жетекші үш мемлекеттің қатарына кіреді. Қол жеткізілген нәтижелер отандық май өңдеу саласы әлемдегі ең перспективалы өткізу нарықтарының бірі ретінде өз орнын бекемдей түскенін көрсетеді және экспорт көлемін одан әрі арттыруға қосымша мүмкіндік береді.
Сондай-ақ, логистикалық жүйе мен клиенттік базаның ұлғайғаны арқасында алдағы 2–3 жылда Қытайға өсімдік майлары мен жоғары ақуызды мал азығы экспортының көлемі жылына 1 млн тоннадан асуы мүмкін деп болжанып отыр.