Қазақстан Республикасы Өнеркәсіп және құрылыс министрі Ерсайын Нағаспаев Astana Mining & Metallurgy халықаралық тау-кен металлургия конгресіне қатысу үшін Астанаға келген Швеция Корольдігі Сыртқы істер министрлігінің сауда жөніндегі мемлекеттік хатшысы Диана Янсемен кездесті, деп хабарлайды kazlenta.kz тілшісі ҚР Өнеркәсіп және құрылыс министрлігіне сілтеме жасап.
Кездесу аясында Қазақстан Республикасы Өнеркәсіп және құрылыс министрлігі мен Швеция Сыртқы істер министрлігі арасында Қазақстан-Швеция сауда-экономикалық және инвестициялық ынтымақтастық жөніндегі алғашқы екіжақты комиссияны құруды көздейтін өзара түсіністік туралы меморандумға қол қойылды. Құжат екі елдің мемлекеттік органдары, іскер топтары, қаржы ұйымдары және ғылыми-зерттеу институттары арасындағы өзара іс-қимылды нығайтуға бағытталған.
«Қазақстан үшін Швеция өнеркәсіп пен технология саласындағы ең перспективалы серіктестердің бірі. Бізде ынтымақтастықтың табысты үлгілері бар. Енді осы оңтайлы қадамдарды ауқымды, жүйелі әрі нақты жобаларға негізделген әріптестікке ұластыру маңызды. Біз Қазақстандағы қызмет аясын кеңейтуге мүдделі швед компанияларына жан-жақты қолдау көрсетуге дайынбыз», – деп атап көрсетті Ерсайын Нағаспаев.
Өз кезегінде Швеция Корольдігі Сыртқы істер министрлігінің сауда жөніндегі мемлекеттік хатшысы Диана Янсе швед бизнесінің еліміздегі қолайлы инвестициялық ахуалға байланысты қазақстандық нарыққа қызығушылығы жоғары екенін атап өтті.
Енді тараптар арасындағы диалог Қазақстан-Швеция сауда-экономикалық және инвестициялық ынтымақтастық жөніндегі екіжақты комиссияның отырысында жалғасатын болады.