2026 жылдың қаңтар-сәуір айларының қорытындысы бойынша Қазақстанның өңдеу өнеркәсібі 9,9%-ға өсті, деп хабарлайды kazlenta.kz тілшісі ҚР Өнеркәсіп және құрылыс министрлігіне сілтеме жасап.
Өңдеу өнеркәсібінің негізгі салаларының басым бөлігінде оң өсім байқалды. Әсіресе жеңіл өнеркәсіп, машина жасау, құрылыс материалдарын өндіру, химия және фармацевтика салаларында өндіріс көлемі едәуір ұлғайды.
Өсімге серпін берген негізгі салалардың бірі – машина жасау. Саладағы өндіріс көлемі 23,3%-ға артты. Елде автокөлік, электр жабдықтары, электроника және түрлі техника өндірісі көбейді. Жеңіл автокөлік шығару 36,5%-ға өсті. Бұл көрсеткішке Қостанайдағы жаңа KIA және Алматыдағы мультибрендті автозауыттардың іске қосылуы оң әсерін тигізді. Сонымен қатар Атырау вагон жасау зауыты вагон-цистерна өндірісін қолға алды.
Химия өнеркәсібінде өндіріс көлемі 18,4%-ға артты. Саладағы өсімге полипропилен, күкірт қышқылы, минералды тыңайтқыштар мен лак-бояу өнімдері өндірісінің ұлғаюы ықпал етті. Сонымен қатар «Еурохим-Қаратау» компаниясының жаңа өндірістік қуаттарды іске қосуы да оң әсерін тигізді.
Құрылыс материалдарын өндіру көлемі 27,7%-ға ұлғайды. Елімізде цемент, бетон, құрылыс қоспалары мен темірбетон бұйымдарын шығару көлемі артты. Бүгінде отандық кәсіпорындар ішкі нарықты негізгі құрылыс материалдарымен толық қамтамасыз етіп отыр.
Ең жоғары өсім жеңіл өнеркәсіпте тіркелді – өндіріс көлемі екі еседен астам көбейді. Елде тоқыма өнімдері, киім, аяқкиім және былғары бұйымдарын шығару айтарлықтай артты. Бұған Ақтөбе, Атырау, Алматы және Түркістан облыстарында жүн өңдеу, кілем, геосинтетика және мақта иірімжібін өндіретін жаңа кәсіпорындардың іске қосылуы ықпал етті.
Сондай-ақ пластмасса бұйымдары, металл конструкциялары, жиһаз, қағаз, азық-түлік және сусын өндірісінде де өсім байқалды.
Жалпы, өңдеу өнеркәсібіндегі өсім жаңа өндірістердің іске қосылуы және бұрын пайдалануға берілген кәсіпорындардың толық қуатта жұмыс істей бастауымен байланысты. 2026 жылдың қаңтар-сәуір айларында елімізде жалпы құны 144,8 млрд теңгені құрайтын 43 жоба іске қосылып, 2 745 жаңа жұмыс орны құрылды.