Астана қаласы бойынша Қылмыстық-атқару жүйесі департаментінде 1 мамыр – Қазақстан халқының бірлігі күніне арналған кең ауқымды, жарқын әрі мерекелік іс-шара жоғары деңгейде өтті, деп хабарлайды kazlenta.kz.
Аталған мерекеге Департаменттің барлық жеке құрамы, оған қарасты мекемелер мен пробация қызметінің қызметкерлері белсене қатысты. Сонымен қатар шараға ардагерлер, зейнеткерлер, қызметкерлердің ата-аналары, отбасы мүшелері мен балалары арнайы шақырылып, мерекенің ажарын аша түсті.
Мерекелік бағдарлама аясында мазмұнды әрі әсерлі концерт ұйымдастырылды. Әрбір мекеме түрлі ұлттың мәдениетін таныстырып, өз өнерлерін ортаға салды. Атап айтқанда, №64 мекеме ұжымы өзбек халқының, №2 мекеме – орыс халқының, №3 мекеме – түрік халқының мәдениетін, ал Департамент пен пробация қызметі қазақ халқының салт-дәстүрін дәріптеді. Қатысушылар ұлттық киімдерін киіп, әсем билерін билеп, әуезді әндерін шырқап, сондай-ақ ұлттық тағамдары мен ерекше салт-дәстүрлерін көпшілік назарына ұсынды. Әр көрініс көрермендердің ыстық ықыласына бөленіп, мерекелік көңіл-күй сыйлады.
Сонымен қатар іс-шара барысында ұлттық спорт түрлерінен жарыстар ұйымдастырылды. Қатысушылар арқан тарту, гір көтеру және қол күрес сынды сайыстарда өзара бақ сынасты. Жарыс қорытындысы бойынша үздік шыққан жеңімпаздар Астана қаласы бойынша ҚАЖ департаментінің бастығы Рустан Ахметжановтың атынан арнайы грамоталармен және кубокпен марапатталды.Бұл мерекелік шара – ұлттар арасындағы достық пен өзара сыйластықты нығайтып, бірліктің маңызын айқындайтын тағылымды іс-шара болды. Көпұлтты ұжымның ұйымшылдығы мен ауызбіршілігі айқын көрініс тауып, қатысушыларға көтеріңкі көңіл-күй мен ұмытылмас әсер сыйлады.