Жақып Хайрушевтің төрағалығымен Энергетика министрлігі жанындағы Қоғамдық кеңесінің отырысы өтті. Іс-шараға Вице-министр Қайырхан Тұтқышбаев, кеңес мүшелері және бейінді департамент басшылары қатысты, деп хабарлайды kazlenta.kz тілшісі ҚР Энергетика министрлігіне сілтеме жасап.
Талқылаудың негізгі тақырыбы мұнай өнімдерінің ішкі нарығындағы тұрақтылықты қамтамасыз ету және газ саласын дамыту бойынша кешенді шаралар болды. Күн тәртібі аясында қатысушылар жанар-жағармай нарығындағы ағымдағы жағдайды егжей-тегжейлі қарастырып, баға белгілеу мен өңірлерді отынмен үздіксіз қамтамасыз ету мәселелеріне ерекше назар аударды.
Сұйытылған мұнай газы нарығының жұмыс істеуі талқыланды. Қоғамдық кеңес мүшелері халықтың қажеттіліктері мен автокөлік үшін газ көлемдерін бөлуде ұзақ мерзімді жоспарлау мен нақты бақылаудың қажеттілігін атап өтті.
Сарапшылар еліміздің кен орындарындағы табиғи және ілеспе газды ұтымды пайдалану мәселелеріне басымдық берді. Қатысушылар газды әрі қарай қайта өңдеу үшін оны кәдеге жаратудың озық технологияларын ендірудің маңыздылығын алға тартты.
Отырыс қорытындысы бойынша отын нарығының мониторингін күшейтуге және өндіруші секторды технологиялық жаңғыртуды жеделдетуге бағытталған ұсынымдар әзірленді.