Қызылордада Ұлттық құрылтайдың V отырысы басталды,деп хабарлайды kazlenta.kz тілшісі Ақордаға сілтеме жасап.
Жиында сөз сөйлеген Мемлекет басшысы Қасым-Жомарт Тоқаев Сыр өңірінің тарихи әрі рухани маңызына тоқталып, бұл аймақтың көне дәуірден бері дамыған қала өркениетінің орталығы болғанын және Қызылорданың ел тағдырына қатысты маңызды шешімдер қабылданған қасиетті мекен екенін атап өтті.«Бүгін Ұлттық құрылтай жиыны осымен бесінші рет шақырылып отыр.
Бұл Форумның алғашқы отырысы ұлт ұясы – Ұлытауда өтті. Екінші жиын түбі бір түркі жұртының қара шаңырағы – Түркістанда болды. Үшінші отырыс бірегей Атырау аймағында ұйымдастырылды. Ал былтыр тарихы бай Көкшетау төрінде жиналдық.
Енді міне, қастерлі Қызылорда жерінде бас қосып отырмыз. Бұл – халқымыз үшін орны ерекше аймақ. «Сыр – Алаштың анасы» деген аталы сөз бар.
Осы атыраптағы Шірік-Рабат, Жанкент, Сығанақ, Алтынасар, Баршын-кент қалаларының орны көне заманның өзінде қазақ жерінде дамыған қала өркениеті болғанын аңғартады. Қызылорданы сол әйгілі қалалардың заңды жалғасы дей аламыз.
Бұл шаһардың тарихи мән-маңызы айрықша. Оның осыдан бір ғасыр бұрын Қазақстан астанасы болғаны баршаға мәлім.
Бұл жерде еліміздің болашағына қатысты аса маңызды шешімдер қабылданды», - деді Тоқаев.