Көлік полицейлері 500-ден астам заңсыз әкелінген діни әдебиетті тәркіледі, – деп хабарлайды kazlenta.kz тілшісі Polisia.kz сайтына сілтеме жасап.
Жыл басынан бері көліктегі полиция департаментінің қызметкерлері діни әдебиетті заңсыз әкелу және тасымалдаудың бірқатар фактісін анықтап, жолын кесті. Жедел алдын алу іс-шаралары барысында 575 дана діни басылым тәркіленді, олардың ішінде ел аумағында таратуға тыйым салынған 32 атау бар.
Бұл туралы Көліктегі ПД бастығының орынбасары Құрмет Мәжікенов хабарлады. Оның айтуынша, Түрксіб станциясында Мәскеу–Бішкек бағытындағы жолаушылар пойызын тексеру кезінде Қырғызстан Республикасының азаматшасынан тыйым салынған материалдар тізіміне енгізілген діни кітап анықталып, тәркіленді. Осыған ұқсас құқық бұзушылықты Орал станциясындағы желілік полиция бөлімінің қызметкерлері де анықтады. 20 жастағы студенттен діни мазмұндағы 12 кітап тәркіленді, олардың бесеуі – тыйым салынған болып шықты. Сонымен қатар Каир–Шымкент әуе рейсі ұшып келгеннен кейін көлік полицейлері Өзбекстан Республикасының 24 жастағы азаматынан заңда белгіленген тәртіпті бұза отырып әкелінген 21 дана діни әдебиетті анықтап, ұстады. Барлық анықталған материалдар тәркіленіп, құқықбұзушылар жауапкершілікке тартылды.