Шығыс Қазақстан облысында адамның иммун тапшылығы вирусын (ВИЧ) жұқтырғандар бұрын-соңды тіркелмеген аудандарда ауырғандар анықталып оты, деп хабарлайды kazlenta.kz тілшісі Қазақпаратқа сілтеме жасап.
Өңір бойынша осы жылдың бірінші тоқсанында АИТВ жұқтыру дерегі өткен жылдың сәйкес кезеңімен салыстырғанда 27 пайыз азайған. Десе де, 3 бірдей ауданда алғаш рет науқастар тіркелді. Ол – Самар, Зайсан және Ұлан аудандары. Бұл туралы ШҚО ЖИТС алдын алу және оған қарсы күрес орталығының өкілі Арай Айдарқызы мәлім етті.- Өңірде АИТВ жұқтырғандар ең көп тіркелетін қала, аудандар - Өскемен, Риддер қалалары мен Алтай, Шемонаиха, Глубокое аудандары. Жас ерекшелігіне келсек, жұқтырғандардың көбі 30-49 жас аралығындағы адамдар. Яғни, ауырғандар жұмыс істейтін азаматтар арасында. Ер адамдар бұл дертке әйелдерге қарағанда екі есе жиі шалдығады, - деді ол.
Мамандардың айтуынша, вирус негізінен жыныстық қатынас арқылы тарайды. Бұл жалпы жұқтырғандардың 75 пайызы.
Еске салсақ, Қызылордадағы АИТВ-инфекциясын жұқтыру оқиғасынан кейін бұйрыққа өзгеріс енгізілгені хабарланған.