ШҚО-да полицейлер тұрғын үйден шыққан өртті сөндірді, деп хабарлайды kazlenta.kz тілшісі polisia.kz сайтына сілтеме жасап.
Шемонаиха ауданында тәртіп сақшылары Жанболат Қажмұханов пен Қуат Бөкенов өтіп бара жатқан адамдардан көрші үйдің төртінші қабатындағы балкон жанып жатқанын естиді. Олар бірден оқиға орнына жетіп, өртті сөндіруге кірісті. Ол кезде жалын төменгі қабатқа да тарала бастаған еді. Полицейлер төртінші қабаттағы жалынды сөндіріп үлгерді. Алайда үшінші қабаттағы пәтердің ішіне кіру мүмкін болмады – тұрғындар үйде болмаған, ал есік құлыптаулы еді. Қажмұханов уақыт жоғалтпай, өмірін қатерге тіге отырып, балконнан төмен түсіп, әріптесінен су құйылған бөтелкелерді алып, өртті толықтай сөндірді. Қызметкерлердің үйлесімді әрекеттерінің арқасында өрттің әрі қарай таралуына жол берілмеді. Ешкім зардап шеккен жоқ, өрт сөндірушілерді шақыру қажет болмады.- Біздің полиция қызметкерлерінің арқасында ешкім зардап шеккен жоқ. Олар жылдам әрі батыл әрекет етті. Оларға тек сәттілік пен зор денсаулық тілеймін, – деп жазды тұрғын.