5 шілде күні Қарағанды қаласында Қазақстанда АЭС салу бойынша жария талқылау өтпекші. Бұл туралы облыс әкімдігінің баспасөз қызметі мәлімдеді, деп хабарлайды kazlenta.kz тілшісі Қазақапаратқа сілтеме жасап.
2023 жылғы 1 қыркүйектегі «Әділ Қазақстанның экономикалық бағыты» атты Қазақстан халқына Жолдауында Мемлекет басшысы Қазақстанда атом электр станцияларын салу мәселесі бойынша жалпыұлттық референдум өткізуге бастамашы болған.
Сонымен қатар, Жолдауда Қазақстан Республикасының Президенті референдум өткізу мерзімдері кейінірек белгіленетінін атап өтті. Референдум өткізу тәртібі 1995 жылғы 2 қарашадағы «Республикалық референдум туралы» Қазақстан Республикасының Конституциялық заңымен регламенттелген.
Қазақстанда АЭС салу мәселесін талқылау мақсатында референдум өткізілгенге дейін Қарағанды обласында жария талқылаулар өткізу жоспарланып отыр.
Жария талқылауға атом саласының салалық сарапшылары қатысады. Жария талқылауларды өткізу барысында азаматтар өздерін қызықтыратын технологиялардың қауіпсіздігі бойынша да, АЭС құрылысының әлеуметтік-экономикалық аспектілері бойынша да кез келген сұрақтарын қоя алады.
Жария талқылау өткізілетін орны: Қарағанды қ., «Қоғамдық келісім» КММ, Кеншілер даңғылы, 64.
Жария талқылауды өткізу күні мен уақыты: 2024 жылғы 5 шілде сағат 15.00-де.
Бұдан бұрын хабарланғандай, Президент Қасым-Жомарт Тоқаев БАҚ саласы қызметкерлерін марапаттау рәсімінде сөйлеген сөзінде елде атом электр стансасын салу жобасы туралы пікір білдірді. Атап айтқанда, АЭС жөніндегі референдум күзде өтеді.
Сондай-ақ, Сенат төрағасы Мәулен Әшімбаев АЭС құрылысында Қазақстан халқы өзі таңдау жасайтынын хабарлаған болатын.
Ал, Мәжіліс депутаты Айдос Сарым АЭС салу референдумында саналы таңдау жасауға мүмкіндік алатынымызды айтқан еді.