Еліміз бойынша мектеп басшыларының арасында өткен ІІІ республикалық «Director`s CUP» дебат турнирінде Шымкент қаласының мектеп директорларының командасы ІІ орынды иеленді.
Білім беру ұйымы басшыларының көшбасшылық қабілеттерін, зияткерлік әлеуетін дамыту, өзекті қоғамдық саяси тақырыптарды талқылауға тарту арқылы олардың азаматтық көзқарастарын дамыту және конструктивті диалог пен пікірталасты жүргізу мәдениетін қалыптастыру мақсатында өткізілген турнирге 21 команда қатысты.
Мектеп директорлары арасында өткен қазақша зияткерлік сайысында ұлттық идеологиямен бірге мәдениет, өнер, білім салалары да назардан тыс қалған жоқ. Қатысушылар жалпы қазақ қоғамындағы өзекті мәселелерді көтеріп, тың идеялар мен механизмдер ұсына білді.
Мегаполис атағын асқақтатқан «Керей мен Жәнібек» фракциясының мүшелері: №125 жалпы орта мектеп директоры Бағлан Умбетбаев Шереханұлы, №132 жалпы орта мектеп директоры Қасымхан Туреханов Алмасханұлы, №1 Талант жалпы білім беру мектебінің директоры Рахат Арғынбай Ердаулетұлы.
Сонымен қатар, жеңіс тұғырынан «QAZBILIM SHYMKENT» ұлттық лицейінің директоры Раман Байбатша Алмасұлы қатысып, алғашқы күнгі интеллектуалдық бағыттағы ойында ІІ орынды иеленді. Білім мен тәжірибе сынға түскен тартыста «Ең үздік спикер» номинациясын №1 Талант жалпы білім беру мектебінің директоры Рахат Арғынбай иеленді.
Қазіргі таңда республика аумағында тап осы сынды айтулы байқаулар көптеп ұйымдастырылып келеді. Бүгінгі ұстаздар да заман талабына сай, әрдайым білімдері мен біліктіліктерін арттырып саналы ұрпақ тәрбиелеуге ат салысуда. Президент Қасым Жомарт Тоқаевтың кезекті Жолдауында айтылған білім саласын трансформациялау жөніндегі тапсырмасы жер-жерден қолдау тауып, нақты іске көші процесі басталды. Мемлекет тарапынан әр жылдары педагогтардың әлеуметтік жағдайын жақсарту мақсатында қыруар қаржы қарастырылуда. Сондай-ақ, олардың әрдайым білімдерін жетілдіріп отыруы үшін түрлі бағдарламалар негізінде оқыту курстары да ұдайы ұйымдастырылады. Ел болашағы білімді жастардың қолында дейтін болсақ, сол өскелең ұрпаққа лайықты білім мен тәрбие беруде ұстаздар қауымының атқаратын еңбектері ұшан теңіз болмақ.
Білім ошақтары басшыларының біліктілігі сынға түскен сайыс осының айғағы болмақ.
16-12-2023, 15:27
"Director's cup" дебат турнирінде шымкенттік директорлар үздіктер қатарынан орын алды
Фото: pixabay.com
Егер мәтінде қате байқасаңыз, оны таңдап, Ctrl+Enter пернелерін басыңыз