Елордада есірткі заттарын таратты деген күдікке ілінген 23 жастағы ер адам анықталды, деп хабарлайды kazlenta.kz тілшісі Polisia.kz сайтына сілтеме жасап.
Жедел-іздестіру іс-шаралары барысында ер адамның тыйым салынған заттарды жасырын орындарға орналастыру мақсатында қаланың шет аймақтарының біріне келгені белгілі болды. Ол есірткі заттарын тарату әрекеті кезінде ұсталды. Жеке тінту барысында және ұсталған жерден өзіне тән иісі бар, ақ түсті ұнтақ тәрізді зат салынған ірі брикеттер табылды.
Сараптаманың бастапқы деректеріне сәйкес, аталған зат альфа-PVP болып табылады. Сондай-ақ ұсталған азамат бұған дейін есірткі заттарын жасырған басқа да орындарды көрсетті. Кейін оның тұрғылықты мекенжайы бойынша жүргізілген тінту кезінде балконнан осыған ұқсас зат салынған ыдыстар анықталды. Барлық заттай дәлелдемелер тәркіленді. Аталған факті бойынша қылмыстық іс қозғалды. Күдікті қамауға алынды. Полиция есірткі заттарының заңсыз айналымына қатысу қылмыстық жауапкершілікке әкеп соғатынын ескертеді. Оңай әрі жылдам табыс табуға уәде беретін ұсыныстар ауыр құқықтық салдарға әкелуі мүмкін.