Таразда есірткі қылмысына қарсы іс-қимыл бойынша бөліністерінің қызметкерлері есірткі заттарын заңсыз сақтады және таратты деген күдікпен ер адамды ұстады, деп хабарлайды kazlenta.kz тілшісі Polisia.kz сайтына сілтеме жасап.
Күдіктіні жеке тінту барысында ақ түсті ұнтақ зат салынған бірнеше бума, сондай-ақ өзіне тән иісі бар сарғылт-ақ түсті зат салынған түйіншектер табылып, тәркіленді. Аталған заттардың жалпы салмағы 23,34 грамды құрады. Іргелес аумақты тексеру кезінде полиция қызметкерлері бұған дейін жасырылған түйіншектер салынған жасырын орындарды анықтады. Сонымен қатар күдіктінің тұрғылықты жерін тексеру барысында әртүрлі пакеттерге өлшеп салынған, таратуға дайын есірткі заттары бар бумалар табылып, тәркіленді. Үйінен табылған есірткі заттарының жалпы салмағы 186,4 грамды құрады. Осылайша, күдіктіден жеке тінту және оның тұрғылықты жерін тексеру барысында барлығы 209,74 грамм есірткі заттары анықталып, тәркіленді.
Ұсталған азаматтың телефонынан есірткі жасырылуы мүмкін орындардың фотосуреттері табылды. Аталған дерек бойынша Қазақстан Республикасы Қылмыстық кодексінің 297-бабы 3-бөлігімен қылмыстық іс қозғалды. Күдікті ұсталып, уақытша ұстау изоляторына қамалды. Қазіргі уақытта қажетті тергеу амалдары жүргізіліп жатыр. Полицейлер есірткі заттарының заңсыз айналымына және оларды жеткізуге қатысы бар болуы мүмкін арналарды анықтауды жалғастырады.