Шығыс Қазақстан облысы полиция департаменті ұйымдасқан қылмысқа қарсы күрес басқармасының қызметкерлері өңірдегі колледждердің бірінде болған бірқатар бопсалау дерегінің жолын кесті. Қылмыстық әрекетке ауданның 17 жастағы тұрғыны күдікті деп танылды, – деп хабарлайды kazlenta.kz тілшісі Polisia.kz сайтына сілтеме жасап.
Алдын ала мәліметтер бойынша зардап шеккендерге келтірілген жалпы шығын көлемі шамамен бір миллион теңгені құрады. Сотқа дейінгі тергеу материалдарына сәйкес, оқиғалардың бірінде күдікті мен жәбірленуші сөзге келіп қалған. Содан күдікті студент жәбірленушіге психологиялық қысым көрсетіп, 160 мың теңгеден астам қаражат талап еткен. Осындай әдіспен басқа да студенттер қымбат смартфондарынан және ақшаларынан айырылған.
Жастар бұл ақшаны достарынан қарызға алған немесе микрокредит ретінде ресімдеген. Сонымен қатар күдіктіге өз құрдастарын заңсыз бас бостандығынан айырды деген айып тағылып отыр. Қазіргі уақытта сот шешімімен кәмелетке толмаған күдіктіге қатысты үйқамаққа алу шарасы таңдалды. Аталған фактілер бойынша ҚР Қылмыстық кодексінің екі бабы бойынша сотқа дейінгі тергеу амалдары жүргізіліп жатыр.