Алматының Бас жоспары қаланың өсу қарқынын ескере отырып, түзетіліп жатыр. Бүгінде қалада 2,3 млн-нан астам адам тұрады, ал іргелес аймақтармен бірге бұл көрсеткіш 3,7 млн-нан асады, деп хабарлайды kazlenta.kz тілшісі Алматы қаласы әкімдігінің баспасөз қызметіне сілтеме жасап.
«Қаланың жедел әрі стратегиялық міндеттері бар, сондықтан Бас жоспар сол өзгерістермен қатар жаңарып отыруға тиіс. Соңғы 20 жылда Алматы халқы шамамен бір миллионға өсті, автокөлік саны 2,5 есе артты, ал құрылыс тығыздығы бүкіл агломерация аумағында өсіп келеді. Осындай жағдайда Бас жоспарды түзету қаланың дамуын басқарудағы негізгі құралға айналады», – деді сәулетші Серікбай Мусин.
Маманның пікірінше, Бас жоспарды түзету біртұтас даму тұжырымдамасын күшейтуге тиіс. Негізгі басымдықтар – көлік пен экология, өйткені дәл осы бағыттар Алматының болашағын айқындайды.