Тараз қаласының прокуратурасы ШЖҚ «Жамбыл су» МКК қызметіне тексеру жүргізіп, инвестициялық бағдарламаға көзделген қаражатты мақсатсыз пайдалану фактісін анықтады, деп хабарлайды kazlenta.kz тілшісі Бас прокуратураға сілтеме жасап.
Жыл сайын кәсіпорында желілерді, аспаптарды және басқа жабдықтарды жаңарту жоспары жасалады.
Осы мақсатта ауыз суды тұтынғаны үшін халықтан түсетін қаражат пайдаланылады.
Тексеру барысында өткен жылғы жаңғырту жоспары 24 млн теңгеден астам сомаға орындалмағаны белгілі болды.
Мәселен, прокуратураның қадағалау актісі бойынша халыққа тарифтік мөлшерлемелерді 63,54 теңгеден 62,65 теңгеге дейін, ал коммерциялық нысандар үшін 167,66 теңгеден 165,35 теңгеге дейін төмендете отырып, өтемдік тариф енгізілді.
Осылайша 108 мыңнан астам абоненттің, оның ішінде 5 мың кәсіпкердің құқықтары қорғалды.
Жол берілген бұзушылықтар үшін ШЖҚ «Жамбыл су» МКК ҚР ӘҚБтК-нің 164-бабының 4-бөлігі бойынша 2,7 млн теңге сомасына әкімшілік айыппұл салынды.