Павлодар облысында көлік кюветке аударылып, төрт адам зардап шекті, – деп хабарлайды kazlenta.kz тілшісі Polisia.kz сайтына сілтеме жасап.
26 тамыз сағат 21:45-те Павлодар – Қызылорда автожолында 36 жастағы Kio Rio автокөлігінің жүргізушісі көлікті басқара алмай жол шетіне аударылып кеткен. Жол-көлік оқиғасы салдарынан жүргізуші, оның 10 жастағы ұлы, 4 жасар қызы және жарақат алған 37 жастағы жолаушы Екібастұз қаласындағы ауруханаға жатқызылды. Автокөлік айып тұрағына қамалды.
27 тамыз сағат 15:50-де Павлодар қаласында Торайғыров – Ак.Бектұров көшелерінің қиылысында Nissan автокөлігінің жүргізушісі бағдаршамның тыйым салу сигналын елемей, 3 көлікпен: Toyota Estima, Lexus және Hyundai автокөліктерімен соқтығысқан.
Салдарынан Nissan және Toyota Estima көлігінің жүргізушісі, Hyundai көлігінің 46 жастағы жолаушысы да жарақат алып Павлодар қаласындағы ауруханаға жатқызылды.
Тағы бір жол-көлік оқиғасы 27 тамыз күні сағат 17:30-да болған. Павлодар – Қызылорда автожолының 140 шақырымында, Байет ауылынан 2 шақырым жерде, BMW автокөлігінің 40 жастағы жүргізушісі көлікті басқара алмай, металл тиегішке соғылып, кюветке аударылған.
Жүргізуші алған жарақаттарынан оқиға орнында қайтыс болды. Автоматты режимде жұмыс істейтін Қызылорда – Павлодар автожолында орнатылған “Зерек-2” аппараттық-бағдарламалық кешенінің мәліметтеріне сәйкес, бұл көлік құралында жылдамдымдығы – 218 км/сағ. тіркелген.