Депутаттарға құқық қорғау жүйесін реформалау аясында жүзеге асырылып жатқан жаңа жобалар ұсынылды, деп хабарлайды kazlenta.kz.
Олар жол полициясы жұмысындағы өзгерістермен, жаңартылған бейнебақылау жүйесімен, электронды білезіктермен, төтенше жағдайда қашықтықтан көмек шақыруға болатын дабыл түймелерімен, электронды форматқа ауыстырылған мемлекеттік қызметтер тізбесімен танысты.
Нариман Мукушев, Halyk Bank мемлекеттік сервистер жөніндегі басқарушы директоры бүгінгі таңда ІІМ-мен бірлесіп автокөлікті қайта тіркеу бойынша қызметті масштабтау жұмысы аяқталғанын атап өтті. Сатып алушы мен сатушы сату туралы келіскен кезде, сәйкесінше, олар барлық процедураларды өздерінің “Homebank” қосымшаларында жүзеге асыра алады және тек соңында сатып алушы техпаспортты, мемлекеттік нөмірді алу үшін мамандандырылған ХҚКО-ға барады.
Айта кету керек, бүгінде мемлекеттік қызметтер ғана емес, қылмыстық істер де электронды форматқа көшірілді. Бұл елімізде қылмыстық процестің үш буынды моделінің енгізілуіне байланысты жүзеге асырылуда.
“Тергеу амалдарының барлығы қазір цифрландырылған. Егер бұрын тергеу органдары өкілдері прокуратураға келісу, бекіту немесе басқа да тергеу әрекеттері үшін барса, бүгінде мұның барлығы электронды форматта жүргізіледі, тиісінше процеске қатысушылардың да, тергеушілердің де уақыты үнемделеді”, – деді Бас прокуратураның Құқықтық статистика және арнайы есепке алу жөніндегі комитетінің бөлім бастығы Қанат Дүйсебаев.
Ведомство басшысы Ерлан Тұрғымбаев халық қалаулыларын еліміздегі криминогендік жағдай туралы хабардар етіп, полицияның ағымдағы жылы атқарған бірқатар жұмыстарына тоқталды. Ал депутаттық корпус реформалардың орындалу барысын бағалады.
“Біз тек жол басында тұрмыз. Егер халықаралық тәжірибеге қарасақ, реформа шетелде 10-15 жыл алады. Реформа – бұл күрделі процесс. Сонымен қатар, ІІМ – ең үлкен құқық қорғау органы. Функциялары өте көп. Біз қазір полицияның жұмысы өзгеріп жатқанын көріп отырмыз. Жол картасы орындалуда, цифрландыру белсенді жүріп жатыр. Қоғаммен өзара іс-қимылдың жаңа модельдері пысықталуда, ал жергілікті атқарушы органдар бұл жұмысқа белсене тартылуда. Өйткені қоғамдық қауіпсіздік – ортақ міндет”, – деп атап өтті ҚР Парламенті Мәжілісінің депутаты Ерлан Смайлов.
“Ішкі істер органдары бірнеше рет реформаға ұшырады. Реформалар қылмысты азайтуға, сотталғандар санын азайтуға және басқа да бағыттарға бағытталған. Бірақ полицияның халыққа жақын болуын қарастыратын реформа қоғам сұранысымен туындады, оны Елбасы, содан кейін Президент қолдады. Менің ойымша, қазір жүргізіліп жатқан реформаларға ықпал еткен қоғамдық сұраныс. Өйткені, олардың назары полицияға деген сенімге, полицияның қоғаммен терең қарым-қатынасына бағытталған”, – деді ҚР Парламенті Мәжілісінің Заңнама және сот-құқықтық реформа комитетінің хатшысы Снежанна Имашева.
Іс-шара соңында депутаттар полиция жұмысын жаңартуға және жетілдіруге бағытталған ұсыныстарды айтты. Ал министрлік өкілдері реформа одан әрі де белсенді түрде жүзеге асырылатынына сенім білдірді.