Оралда жолаушыларды заңсыз тасымалдаумен айналысқан шетелдік елден шығарылды, — деп хабарлайды kazlenta.kz тілшісі Polisia.kz сайтына сілтеме жасап.
2025 жылғы 11-14 наурыз аралығында облыс аумағында "Заңсыз келуші" республикалық жедел-профилактикалық іс-шарасы өткізілуде. Іс-шара қоғамдық тәртіпті сақтауға, заңсыз көші-қонның алдын алуға және жолын кесуге, сондай-ақ шетел азаматтары мен азаматтығы жоқ адамдардың Қазақстан Республикасының аумағында болу қағидаларын бұзу фактілерін анықтауға бағытталған. Орал қаласы полиция басқармасының көші-қон қызметі бөлімінің инспекторлары 34 жастағы шетелдік Орал қаласында өзінің Chevrolet Lacetti автокөлігімен жолаушылар тасымалымен заңсыз айналысқанын анықтады.
Құқық бұзушыға қатысты ҚР ӘҚБтК-нің 517-бабының 5-бөлігі бойынша әкімшілік хаттама толтырылып, соттың шешімі бойынша ол республикадан шығарылды. Өңірдегі құқықтық тәртіп пен қауіпсіздікті қамтамасыз ету мақсатында шетелдік қонақтарды Қазақстан Республикасының заңнамасын қатаң сақтауға және ел аумағында болудың белгіленген ережелерін бұзбауға шақырамыз. Іс-шараның бір күнінде 29 шетелдік ҚР-да болу ережелерін бұзғаны үшін әкімшілік жауапкершілікке тартылды, 8 азамат елден мәжбүрлі түрде шығарылды, іздеуде жүрген 2 қылмыскер ұсталды.