БҚО-да мал ұрлығына қатысты екі күдікті ұсталды, – деп хабарлайды kazlenta.kz тілшісі Polisia.kz сайтына сілтеме жасап.
Батыс Қазақстан облысында полиция қызметкерлері прокуратураның үйлестіруімен жүргізілген жедел-іздестіру шаралары барысында мал ұрлығымен айналысты деген күдікпен екі ер адамды ұстады. Олар Ақжайық ауданы аумағындағы жайылымнан ірі қара мал мен жылқы ұрлады деген күдікке ілінген.
Күдіктілердің бірінің көлігін тексеру кезінде бір ірі қара малдың еті табылса, екінші күдіктінің тұрғылықты жерінен тағы бір малдың еті тәркіленді. Сонымен қатар тінту барысында полиция қызметкерлері жануарлардың терілері мен қалдықтарын анықтады.
Қазіргі таңда күдіктілерге қатысты бес эпизод бойынша сотқа дейінгі тергеу басталды. Күдіктілердің бірі уақытша ұстау изоляторына қамалды. Құқық қорғау органдары олардың өзге де ұқсас қылмыстарға қатысы бар-жоғын тексеруді жалғастыруда.