2022 жылдың үшінші тоқсанында денсаулық сақтау қызметтері ақшалай түрде 636 млрд теңгені құрады, бұл өткен жылдың сәйкес кезеңімен бірдей дерлік, деп хабарлайды energyprom.kz-ке сілтеме жасаған kazlenta.kz
Өңірлер бойынша қызмет көрсетудің ең үлкен көлемі Алматыға тиесілі: 139,7 млрд теңге — бір жыл бұрынғыдан құндық мәнде 14,7% артық. Үздік үштікке сондай-ақ елорда (98 млрд теңге) және Қарағанды облысы (37,3 млрд теңге) кірді. Қызмет көрсетудің ең аз көлемі жаңадан құрылған Ұлытау облысында (3,9 млрд теңге) байқалды. Одан кейінгі орында Солтүстік Қазақстан және Абай облыстары.
2022 жылдың қараша айының соңында амбулаторлық қызметтері жылдық динамика бойынша 17,8% қымбаттады. Бағаның өсуін ең көп Қарағанды облысының тұрғындары сезінді: бір жылда 30,6%. Одан кейінгі орында Маңғыстау (28,1% қымбаттаған) және Ақмола (25,8% қымбаттаған) облыстары. Амбулаторлық-емханалық қызмет құнының ең аз жылдық өсімі Батыс Қазақстан (бір жылда 2,4%), Алматы (8,8%) және Ақтөбе (9,6%) облыстарында тіркелді.
Inbusiness.kz сайты сенатор Еділ Мамытбековке сілтеме жасап, ақша толығымен игеріліп жатқанын, бірақ медициналық қызметтің халыққа жетпей жатқанын хабарлайды. «Мен келесі сұрақтарды қойғым келеді. Бүкіл денсаулық сақтау саласын қаржыландыру 2018 жылы — 900 млрд теңге, 2019 жылы — 1 трлн, 2020 жылы — 1,5 трлн, 2021 жылы — 2,3 трлн, оған қоса пандемиямен күресуге 860 млрд, 2022 жылы — 2,5 трлн теңге бөлінді. 2022 жылдың қыркүйегінде ақша таусылды. Сұрақ: 2022 жылдың қаңтарында премьер-министр салаға толық қаржылық аудит жүргізуді тапсырды. Денсаулық сақтау министрлігі не істеді, қандай қорытынды шығарды?» — деді сенатор. Оның сұрағына әлі жауап жоқ.