Ұялы телефонияның таралуымен абонентке басқа операторға ауысқаннан кейін де өз телефон нөмірін сақтап қалу мүмкіндігін беру мәселесі өзекті бола бастады. Бүгінде Қазақстанда мұндай мүмкіндік бар, деп хабарлайды finprom.kz-ке сілтеме жасаған kazlenta.kz
MNP* (Mobile Number Portability) қызметі Қазақстанда 2016 жылы іске қосылды, содан бері ол танымалдылығын жоғалтқан жоқ. 2016 жылдан 2021 жылға дейін бұл қызметке берілген өтініштер саны 129 мың мен 148 мың арасында болды. Бір қызығы, 2022 жыл абсолютті рекорд орнатты. Мәселен, биыл жыл басынан бастап 21 қазанға дейін нөмірді көшіру қызметі 160,2 мың рет пайдаланылды.
Бұл ретте 85,4 мың абонент Beeline-ға ауысты. Былтырғы 12 айда да Beeline осы көрсеткіш бойынша көшбасшы болған. Көшірілген нөмірлердің 53%-ы осы операторға ауысқан еді.
Ескерту: 2022 жылдың шілде айының басына қарай Beeline абоненттік база бойынша көшбасшы болып қалды: 10,3 млн абонент. Бұл ретте, өткен жылдың сәйкес кезеңімен салыстырғанда, абоненттер саны айтарлықтай 6,6% өсті. Бүгінгі таңда оператор нарықтың 42%-ына жуығын құрайды.
Сонымен қатар, Kcell ұялы байланыс операторының абоненттерінің саны 8 млн-ды немесе нарықтың 32,6%-ын құрады. Ал Tele2/Altel абоненттерінің саны, біздің бағалауымыз бойынша, 6,2 млн. Жалпы, 2022 жылдың қазан айына дейін елімізде 25,3 млн ұялы байланыс абоненті болды, бұл өткен жылдың сәйкес кезеңімен салыстырғанда 4,5% көп.
Бұл ретте сектордағы өсім алдыңғы үш жылдық құлдыраудан кейін байқалғанын атап өткен жөн. Мәселен, өткен жылдың сәйкес кезеңінде көрсеткіш 1,1%, 2020 жылы 5,3%, 2019 жылы 2,6% төмендеген. Бүгінгі таңда ұялы байланыс секторы интернеттің енуі мен қолжетімділігін арттыру арқылы цифрлық қызметтердің дамуына түрткі болуда. Нөмірді сақтай отырып, операторларды ауыстыру мүмкіндігі бұл нарықты бәсекеге қабілетті және ашық етеді.