«Абайдың бір сөзі сыпайлыққа, бір сөзі еңбектенуге, бір сөзі өнер, білім, ғылымға, бір сөзі әділет, арлылық, махаббатқа үндейді. Абай – көреген көшбасшы. Абай құдiретi дегенiмiз – ұлт болмысының құдiретi. Сол себептi Абай поэзиясының таңғажайып көркемдiк нақыштары, сұлулық сырлары, әдеби-эстетикалық дүниетану даралығы, образдық-символдық астар-қабаттары телегей. Абай шығармашылығы – замандар мен дәуiрлер бойы жасаған халық тiлiнiң айнасы, халықтың айдын шалқар өмiрлiк тәжірибесi, ақыл-ой қазынасы»,-деп атап өткен болатын Серік Негимов.
Абайды тану, Абайды зерделеу – ұлт қазынасына қосылған мол үлес. Абайды білу өзіңді, өз халқыңды білумен тең. Хакім жырларын зерттеу ісі тәуілсіздік жылдарынан бері жаңаша сипат алғаны көңіл қуантады.Іс-шараға қала әкімінің орынбасары Сәрсен Құранбек, көрнекті ақын, Мемлекеттік сыйлықтың иегері Иран-Ғайып Оразбаев, қала мектептерінің әдебиет және тарих пәнінің мұғалімдері, кітапхана қызметкерлері, зиялы қауым өкілдері қатысты. Тағылымды жиынды қоғам қайраткері Бекет Тұрғараев жүргізіп отырды.
Қоғам қайраткері Бекет Тұрғараев жыр дастанның 300 жылдығына арналған іс-шаралардың орындалу барысынан хабардар етті. Сот жүйесінің ардагері Өміртай Қалқұлов «Ақтабан шұбырынды, Алқакөл сұлама» дәуіріндегі Алқакөл орнының аталу тарихына, филология ғылымдарының докторы, профессор Серік Негимов Қожаберген Толыбайұлының «Елім-ай» дастан жырының жазылу тарихы мен «Ақтабан шұбырынды, Алқакөл сұлама» аталудың себептеріне тоқталды.
Іс-шара өскелең ұрпақтың патриоттық рухын көтеріп, өз тарихын біліп, елін, жерін қорғауға және отансүйгіштікке тәрбиелеп, ұлттық рухты қалыптастыруды мақсат еткен.
Шымкент қаласы әкімінің орынбасары Сәрсен Құранбек аталған кітаптың жастар тәрбиесіне қосар үлесі мол екенін атап өтті. Сәрсен Абайұлы келесі жылы қала оқушыларына арналған «Абай оқуларын” ұйымдастыру жоспарда екенін мәлімдеді. Сондай-ақ, іс-шарада Серік Негимовтің “Абай ғибратнамасы” кітабының тұсауы кесілді. Қала ұстаздары, оқырмандар кітап мазмұны жайында ой-пікірлерімен бөлісті. Белгілі ғалым көпшілікпен емен-жарқын сұқбаттасып, оқырмандардың сауалдарына жауап берді.
Айта кетейік, Абай шығармашылығында оның мақсаткерлiк тұлғасына тән тәлiмгерлiк, өнегелiк қырлары аса мол. Автор еңбегінде соның бәрін cалмақтап-саралаған және Абайдың ел бiрлiгi, халық тағдыры, әлеуметтiк тұрмысы турасындағы асыл ойларын өрбiткен.