Бас прокуратура жерді беру және оны мақсатты пайдалану кезінде ашықтықты қамтамасыз ету міндетін алға қойды. Осы орайда Қазақстанның Бас прокуратурасы коммерциялық жерлерді кәсіпкерлік үшін беру бойынша электронды алаң құруды жоспарлап отыр. Бұл туралы Бас прокурордың орынбасары Марат Ахметжанов мәлімдеді.
«Біздің алдымызға жерді беру және оларды мақсатты пайдалануда ашықтықты қамтамасыз ету міндеті қойылды. Ол үшін ҚР Ауыл шаруашылығы министрлігімен бірлесіп, жер телімдерін бөлудің электрондық алаңын құратын боламыз. Бұл мемлекеттік органдар тарапынан сыбайлас жемқорлықтың алдын алуға және бюрократиялық кедергілерді болдырмауға өз септігін тигізетін болады», - дейді Марат Ахметжанов.
Марат Ахметжановтың айтуынша, биыл прокуратура органдары 31,6 мың гектар жерде 10 мыңға жуық коммерциялық жердің пайдаланылмағаны анықтаған. Олардың айналымға енбеуінің себебі инфрақұрылымның әсері мен қала құрылысы құжаттарының болмауынан, сонымен қатар әкімдіктердің әрекетсіздігі мен бақылаудың төмендігінен болып отыр.
Сонымен қатар «Атамекен» ҚР Ұлттық кәсіпкерлер палатасы төралқа төрағасы Тимур Құлыбаев елімізде жер аукциондарының әлеуеті нашар пайдаланылып жатқанын атап өтті. Соның ішінде өткен жылы ауданы 250 мың гектар болатын коммерциялық жер учаскелеріне 17 мың рұқсаттама құжаты берілген, ал жер аукциондары арқылы тек 1 мың жер телімі таратылған.
Сондай-ақ Тимур Құлыбаев жер аукциондары арқылы мемлекеттік кірісті ұлғайту мүмкіндігі бар екенін айтады. Оның айтуынша, Алматы қаласында өткен аукцион кезінде жердің бастапқы құны 88 есеге дейін өскен.
Айта кетсек, жер учаскелерін электронды платформа арқылы беру жұмыстары «Цифрлық Қазақстан» мемлекеттік бағдарламасының салалық бағыттарын жүзеге асыру мақсатында қолға алынып отыр.