Телеарнаның хабарлауынша, Маралды ауылының маңы қазылып, жайылым тарылған. Елді мекеннің сиырлары алтын қазғандардың қопарып тастаған жерінде жайылуда, дейді олар. Ал ауыл тұрғындарының сөзінше, кен іздегендер ауыл төңірегіне келгелі малдың жайылымы ғана емес, елдің тынысы да тарылған. Өзендегі балық саны да азайған.
"Ауылымызды түгел шаң басып кетті. Ауыл адамдары демалудан қалды. Бәрі үйіне тығылып жатыр. Қазір басталмай жатып осылай болса, фабрика салынса не болады?", - дейді Әділ Қожықов есімді ауыл тұрғыны.
Жергілікті халық алтын өндіретін фабрика салынса, мөлдіреп ағып жатқан Күршім өзені де жарамсыз күйге түсе ме деп алаңдайды.
"Мына жер алтын қазатын жер емес, бұл - туризмді дамытатын жер. Біздің жерімізде, мына өзенде таза балық өседі. "Қызыл кітаптағы" таймень, хариус бар", - дейді тұрғындардың бірі. Ал компания өкілі бұдан келер қауіптің жоғын айтады.
"Ауылдың дәл төбесінде тұр деп тауды айтып жатыр. Таудың ішінде кен орындары бар. Бұл фабрика кен орнының үстіне салынбайды. Бір жотадан ары қарай. Ауылға дейін үш шақырым", - деп жауап берді кен өндіруші компанияның экологы Дәулет Асанов тұрғындар шағымына.
Сондай-ақ компанияның геолог маманы кен алуға рұқсат қағазы бар екенін алға тартады. Осы ретте Маралдыға Экология, геология және табиғи ресурстар министрлігінің Экологиялық реттеу және бақылау комитетінің төрағасы Зұлфықар Жолдасов арнайы келіп, қоғамдық тыңдауға қатысқан. Жиында тұрғындар алтын өндіретін фабрика салынбасын деген талап қойған. "Халықтың, осы жердің тұрғындары, көпшілік наразылығын білдіріп жатыр. Негізі кез келген жоба, кез келген бастама тек халықтың тыңдауымен өтуі керек. Соны басшылыққа алып, шешім шығарамыз", - дейді Зұлфықар Жолдасов. Тұрғындардың талабына байланысты нақты шешім бір айдан кейін айтылатын болды.