Биыл елімізде 675,7 мың тонна картоп жиналды. Бұл туралы бүгін Үкімет отырысында ҚР Ауыл шаруашылығы министрі Ербол Қарашөкеев айтты, деп хабарлайды ҚазАқпарат-қа сілтеме жасаған kazlenta.kz
«Майлы дақылдардан 3,4 млн гектардың егіні жиналуы тиіс. Бүгінгі күні гектарына 7 центнер өнімділікпен 16,6 мың гектар жиналды. Картопты алар болсақ, жинау алаңы 198,9 мың гектар. 675,7 мың тонна өнім жиналды, өнімділігі гектарына 203 центнерден. Көкөністерді жинау алаңы 169,7 мың гектарды құрайды. Орташа алғанда гектарына 253 центнер түсімділігімен 1,9 млн тонна жиналды», - деді министр.
Оның атап өтуінше, егіс науқаны сапалы тұқымдарды қолдана отырып, оңтайлы мерзімде жүргізілді. «Фермерлер тыңайтқыштарды уақытында септі. Дақылдарды арамшөптер мен ауруларға қарсы химиялық өңдеуді уақтылы жүргізді», - деді Ербол Қарашөкеев.