Батыс Қазақстан облысында спорттық бағдарлаудан Орал қаласының ашық чемпионаты оздырылды. 3 күнге созылған спорттық шара қалалық дене шынықтыру және спорт бөлімінің ұйымдастыруымен өткізілді. Аталмыш жарыста М.Өтемісов атындағы БҚУ, №26 Жалпы орта білім беретін мектебі, Облыстық туризм орталығы, Бәйтерек, Теректі, Қаратөбе, аудандары мен Орал қаласының спортшылары өзара бақ сынасты, деп хабарлайды kazlenta.kz.
Чемпионатқа жалпы саны 120-ға жуық спортшы қатысып, тартысты ойын өрнегін көрсете білді.
Спорттық жарыс «спринт», «орта», «кросс» қашықтықтарын қамтыды. Жарысқа 12, 14, 16, 18 жас ерекшеліктері бойынша ер балалар мен қыздар және 20, 21 жастан жоғары жас ерекшеліктеріндегі ерлер мен әйелдер қатысты. Аталмыш Орал қаласының ашық чемпионаты барысында спортшылар спорттық бағдарлау бағыттарында белгіленген межеге тез жету, қойылған бақылау нүктелерін ереже бойынша бағындыруды меңгеру кезіндегі бәсекелестік қабілеттері арқылы жоғары нәтижеге жетті. Қызықты да тартысты ойын барысында спортшылардың жылдамдығы, ептілігі және логикалық ойлау қабілеттері байқалып, сарапқа салынды. Табиғат аясында өткізілген дәстүрлі жарыс қатысушылардың көңілінен шықты. Төрешілер алқасы былтырғымен салыстырғанда командалардың спорттық бағдарлау деңгейінің өскендігін атап көрсетті. Жарыс қашықтықтары «Орал» спорт клубының спорттық туризм базасы аумағындағы орманды алқаптың жаңа полигонында ұйымдастырылды.
Ерекше атмосферада өткен чемпионат қорытындысы бойынша спортшылар I, II, III дәрежелі дипломдармен марапатталды. Жарыс қатысушыларының ұпай жиынтығы бойынша жүлделі І орынды Теректі ауданының командасы қанжығалады. Ал Орал қалалық «Атамекен» командасы қарсыластардан сәл артта қалып, ІІ орынды иеленсе, Бәйтерек ауданының командасы жүлделі ІІІ орынға ие болды.