Журналист Нартай Аралбайұлы қазіргі Жамбыл облысының әкімі Бердібек Сапарбаевтан сұхбат алыпты.
Әңгіме барысында әкім мемлекеттік қызмет, үкіметтің қазіргі жұмысы, қазақ тілінің жағдайы, кадр, жастар, кедейшілік, демократия, қуаңшылық, қымбатшылық мәселесіне тоқталды. Сондай-ақ ол соңғы кезде әлеуметтік желіде бір-бірін жамандау, даттау көбейгеніне назар аударды. Әрине дәлелді пікір айтылуы қажет дейді Сапарбаев.
Журналист әлеуметтік желіде Сапарбаевтың Ақтөбе облысында әкім болып тұрғанында әкімдікке 1,7 миллион теңгеге орындық, 500 мың теңгеге ыдыс алдырғаны туралы сұрады. Ал осыған дейін бірнеше лауазымды қызмет атқарған, қазір Жамбыл облысын басқарып отырған Сапарбаев соншалықты орынсыз шығын жасайтындай ақымақ емес екендігін алға тартты.
«Ондай ақымақ емеспіз ғой. Оны жазған адам дәлелдесін, кім алды, кім тапсырыс берді, ақша қайдан келіпті? Олай болуы мүмкін емес. «Тисе – тұяққа, тимесе - бұтаққа» деп айта беруге болмайды», - деп атап өтті Сапарбаев Аралбайұлының YouTube-каналында берген сұхбатында.
Естеріңізге сала кетейік, біршама уақыт бұрын Демпартия белсендісі Жанболат Мамай YouTube арнасында Жамбыл облысының әкімі Бердібек Сапарбаевқа қатысты түрлі ашық айыптаулармен видео материал жариялаған болатын.
Ал бұдан бұрын қоғам белсендісі Жанболат Мамай мен Инга Иманбаева «Нұр Отан» партиясы төрағасының бірінші орынбасары Байбектің ар-намысына, іскери беделіне нұқсан келтіретін ақпаратты жариялаған.
Осыған қатысты сот болып, жауапкерлердің Бауыржан Байбек туралы таратқан ақпаратын шындыққа сай емес және ол ар-намыс, іскери беделге нұқсан келтірді деп танылды. Мамай мен Иманбаева интернетте жарияланған мәліметті терістеп, өшіруге міндеттелді.