Жылыту маусымы басталғалы бері Семейдегі жылу желілерінде 147, жылу көздерінде 31 ақау шыққан. Бұл туралы баспасөз мәслихаты барысында «Теплокоммунэнерго» МКК директоры Серік Түленбергенов мәлім етті, деп хабарлайды ҚазАқпарат-қа сілтеме жасаған kazlenta.kz
"Бүгінгі таңда барлық жылу көздері температуралық режимге сәйкес жұмыс істеп тұр. Абоненттер жылумен үздіксіз қамтылған. Төтенше жағдайларды жедел жою үшін материалдық-техникалық ресурстардың қоры жеткілікті", - деді ол.
Серік Түленбергеновтің айтуынша, үйлер мен нысандардың жылумен қамтамасыз етілуіне күнделікті бақылау жүргізілуде.
«Тексеру нәтижелері бойынша бірнеше тұрғын үйдің жылыту маусымына дайындық паспорттарының жоқтығы анықталды. Тіпті көптеген үйлерде басқару органы да жоқ (МИБ, ПИК). Бүгінде қала бойынша жылу желілерінің тозуы орта есеппен 68% құрайды», - деді компания директоры.
Сондай-ақ бүгін 103-ші қазандықтың құбырында жарылыс болған. Ол Засядко көшесінде орналасқан. Аталмыш құбырға 150 абонент қосылған. Ақау қысқа мерзімде жойылды.