Батыс Қазақстан облысындағы Ақсай қаласында Қазақстан Республикасының Тәуелсіздігінің 30 жылдығына және Ақсай қаласы күні мерекесіне орай бадминтоннан 2007 ж.т және одан кіші жасөспірімдер арасында Бөрлі ауданының балалар-жасөспірімдер спорт мектебінің біріншілігі ұйымдастырылды. Ақсай қаласы Конденсат АҚ спорт кешенінде ұйымдастырылған біріншілікке 40 жас бадминтоншы қатысып, өз шеберліктерін көрсетті, деп хабарлайды kazlenta.kz.
Жастар арасында дене шынықтыру және спортты дамыту, салауатты өмір салтын насихаттау және белсенді спорт түрі ретінде аталмыш ойынды дәріптеу мақсатында өткізілген шара жастардың спортқа деген қызығушылығын арттыруда маңызды рөл атқарады. Елімізде аталмыш спорт түрі 1964 жылдан бастап дами бастады. 2015 жылы аталмыш Конденсат АҚ спорт кешенінде бадминтоннан халықаралық жарыс өткізілген еді. Халықаралық жарыста жалпы саны 17 мемлекеттің спортшылары жарысқан залда жас спортшыларымыз да өзара бақ сынасты. Кезінде ҚР мемлекеттік жаттықтырушысы Мәлік Бейсалиев «Қазақстандағы бадминтонның дамуына Батыс Қазақстан облысының қосқан үлесі орасан зор» деген еді. Осы орайда жас спортшыларымызды осы спорт түрінен дайындап, болашақтарына үлес қосу –маңызды.
Аталмыш жарыс қыздар және ер балалар арасында өткізілді. Жас бадминтоншылар арасында өткізілген жарыс қорытындысы бойынша қыздар арасында жекелей санатта жүлделі 1 орынды Савчук Ангелина қанжығасына байласа, 2 орынды Байтемирова Динара иеленді. Өз кезегінде Фащенко Полина жүлделі 3орынды иеленді. Ал ер балалар арасындағы жекелей санатта жүлделі 1 орынға Сумкин Трофим ие болды. Жас бадминтоншы Ғалиақбар Ғалымбек 2 орынды қанжығасына байлады. Ал жас спортшы Максутов Нурлан 3 орынмен марапатталды.
Жарыстың барша жеңімпаздары мен жүлдегерлері Бөрлі ауданының балалар-жасөспірімдер спорт мектебінің арнайы дипломдарымен және медальдарымен марапатталды.