Батыс Қазақстан облысындағы Ақсай қаласында Қазақстан Республикасының Тәуелсіздігінің 30 жылдығы аясында және Қазақстан халқы тілдері күніне орай «Тілім менің –қуатым!» атты мерекелік шара оздырылды. Аталмыш мерекелік шараға ауданда мемлекеттік тіл саясатын жүзеге асыруға, мемлекеттік тілдің мәртебесін нығайтуға үлес қосып жүрген тіл жанашырлары, мектеп мұғалімдері мен оқушылары, тіл айлығы аясында өткізілген байқаулардың жеңімпаздары қатысты, деп хабарлайды kazlenta.kz.
Бөрлі ауданының мәдениет және тілдерді дамыту бөлімінің басшысы Исатай Тастемірұлы Карабаев шараға қатысушы барша тіл жанашырларын, байқау жеңімпаздарын, мектеп мұғалімдерін мерекемен құттықтап өтті. Сонымен қатар мемлекеттік тілдің мәртебесін нығайту бағытында түрлі шараларға қатысып, қоғам алдында белсенділік танытқандары үшін алғысын білдірді. Келесі кезекте Батыс Қазақстан облыстық тілдерді дамыту басқармасының алғыс хатымен Ә. Идгеева, Ж.Ниярова, Б.Шалтанова, Б.Исмагулованы және облыстық «Тілге құрмет – елге құрмет» челленджіне белсене қатысқаны үшін К. Комаринскаяны марапаттады.
Шара барысында үш тілді – қазақ, ағылшын және орыс тілдерін жетік меңгерген қабілетті тұрғындарды анықтау және қолдау, тіл мәдениетін көтеру мақсатында өткізілген «Тіл — тұнық ойдың кәусары» атты аудандық байқауда өз талантымен танылған өнерлі жастарды жүлделерімен құттықтап, марапаттады. Келесі орайда «Тіл –тәуелсіздік тірегі» атты аудандық қашықтық шығармалар байқауында үздік шығармасымен ерекшеленген, шығармасы «Орал өңірі» газетінде жарияланған жеңімпаз Мұқанова Айымгүл Асқарқызы және өзге де жүлдегер атанған қатысушылар арнайы алғыс хаттармен және бағалы сыйлықтармен марапатталды. Шығармалар байқауына белсене қатысқаны үшін қатысушыларға Бөрлі ауданының мәдениет және тілдерді дамыту бөлімі басшысының арнайы алғыс хаты табысталды. Жеңімпаздарға дипломдар мен естелік сыйлықтар табыс етілді.