Батыс Қазақстан облысының Ақсай қаласында Қазақстан Республикасы Тәуелсіздігінің 30 жылдығына орай Ақсай қаласының туған күні аясында Бөрлі ауданы әкімі кубогіне арналған Республикалық «Жайдарман жұлдыздары Ақсайда» тақырыбындағы жайдарман ойындары өтті. Аталмыш ойынға елімізде республикалық деңгейде өнер көрсетіп жүрген атақты командалар мен облысымызда танымал командалар қатысты, деп хабарлайды kazlenta.kz.
Республикалық Жайдарман ойынының шымылдығы қала күніне орай Ақсай қаласына арнап шығарылған жаңа әнмен ашылды. Жарқынбек Шынтаевтың сөзіне жазылған Ербол Акбасовтың әні "Aksai is beautifiul city" атты жаңа ән шараның көркіне көрік қосты. Әннің алғашқы орындаушылары болып Алдаберген Аймағанбетов, Гүлсезім Қуанышқалиева, Эдуард Садыков атанды. Қала күніне орай ұйымдастырылған Жайдарман ойынына 11 команда қатысты. Ойын «Ақсай қаласы, Бөрлі ауданы» еркін тақырыбында өткізілді. «Қарашығанақ» спорт кешенінің сахнасына атақты квн ойыншылары, әзіл-сықақ жобаларының өкілдері және блогерлер жиналды.
Бөрлі ауданы әкімінің кубогына арналған Республикалық Жайдарман ойынының қазылар алқасы құрамына «Назар аудар» театрының актеры Марс Жайлауов, ардагер жайдарманшы Данияр Искали, БҚО қазақша күрес ассоциациясының президенті Әсет Сұлтанұлы, Режиссер —Артпрактик Арна Доспулаева, Жастар ресурстық орталығының басшысы Руслан Азаматов, Тәуелсіздік құрдасы, ақын Жарқынбек Шынтаев, Ақсай радиосының жүргізушісі Ақтілек Кадыров кірді. Ойынды «Назар аудар» театрының актеры Самат Қабдиев тізгіндеді. Әзілге толы жалынды кеште Маңғыстаудан келген «Боранқұл» командасы, Ақтөбелік «Фемида» командасы, Атыраудан келген «Сағыз» құрамасы, Оралдық «ҚАЗИИТУ», «Европолюс», «Грант», «Талант», «Дежавю» құрамалары, Сырымдық «Ақырап 25», Бәйтерек ауданының командасы «Белес» және Қаратөбеден келген «Қаратөбе» командалары өнер көрсетті. Ойынға қатысушы командалар көрермендер мен телекөрермендерге керемет көңіл-күй мен жағымды эмоциялар сыйлады.
Ойын нәтижесі бойынша бас жүлдеге Маңғыстаулық «Боранқұл» мен Ақтөбелік «Фемида» құрамалары ойыншыларынан құралған құрама топ ие болды. 1 орынға Оралдық «Дежавю» командасы лайық атанса, 2 орынды Атыраудан келген «Сағыз» командасы мен Оралдық «ҚАЗИИТУ» командасы мүшелерінен құралған құрама топ қанжығалады. Жүлделі 3 орынды Сырымдық «Ақырап 25» командасы иеленді. Ойын барысында үздік өнер көрсетіп, халық қалаулысы атанған жанға берілетін дәстүрлі "Үздік ойыншы" номинациясын Бөрлі аудандық "Квартал Ақсай" командасының капитаны Ислам Тлекешов жеңіп алды. Аталмыш өткізілген Республикалық жайдарман ойынының бас жүлдесінің кубогын аудан әкімі Сатқанов Миржан Мұнайдарұлы арнайы табыстап, қатысушы командаларға алғысын айтып ақ жол тіледі.