Тамыз айының 20 жұлдызы қалалық мәдениет және демалыс саябағында NEET санатындағы жастармен кездесу өтті. Ашық аспан астында «NEET санатындағы жастарды әлеуметтендіру: білім және еңбек» тақырыбында өткізілген шара TEDx форматында өткізілді, деп хабарлайды kazlenta.kz.
Аталмыш шара «Білім беру процесіне және жұмыспен қамтуға тартылмаған жастарды әлеуметтендіру бойынша шараларды әзірлеу және іске асыру» жобасының шеңберінде атқарылды. Осы санаттағы жастарды әлеуметтендіру және ақпараттық-түсіндіру жұмыстарын жүргізу шараның басты мақсаты болып табылады. Сонымен қатар жастарды еңбекке баулып, өз жетістіктері арқылы мотивация беруді мақсат еткен облысымыздың белсенді жастары шара қонақтары болды. Кездесуге Батыс Қазақстан облысы әкімінің орынбасары Бақытжан Нарымбетов, «Рашидов» ШҚ басшысы, жас кәсіпкер Азат Рашидов, «Назар аудар» театрының актеры, автор Самат Қабдиев, «Болашақ» бағдарламасы аясында оқып келген маман, жас директор Жансұлтан Нұрмұханов, блогер Динара Аянова мен әнші MIKO қатысты.
Аталмыш шара модераторы Батыс Қазақстан облысы бойынша «Болашақ» қауымдастығының директоры Салтанат Тұманбаева алғашқы сөз кезегін Батыс Қазақстан облысы әкімінің орынбасары Бақытжан Хаберұлына берді. Бақытжан Нарымбетов барша жиналған жастар қауымына ізгі тілектерін білдіре отыра, қазіргі заман құндылықтарының өзгеріп бара жатқандығын тілге тиек етті. Сонымен қатар әлеуметтік желілердегі жастар белсенділігін атап өтіп, жетістікке жетудің формуласы – еңбек пен білімде екенін атап өтті. Келесі сөз кезегін алған сценарист, актер Самат Қабдиев та жастарға жылы лебізін жеткізді. Өзінің қиындығы мен қызығы қатар жүретін өнер жолындағы жетістікерін, актерлыққа келу жолын айтып берді. Басқа спикерлер де сөз алып, өз жетістіктерімен, өміріндегі қызықты сәттермен бөлісті.
Азат Рашидов, «Рашидов» ШҚ басшысы, жас кәсіпкер:
Мен алғашқы бизнесімді 30 мың теңгемен бастағанмын. Өз кәсібімді қалыптастыру барысында алдымнан шыққан қиындықтарға, басқа мүмкіндіктерге қарамастан өз арманыма, мақсатыма берік болдым. Соның арқасында қазір үлкен жетістіктерге жетіп отырмын. Сол себепті барша жастарға алдарына айқын мақсат қойып, сол мақсатқа жетуге деген құлшыныстары таусылмасын деп тілеймін. Тәуекелден қорықпаңыздар, армандарыңызға адал болыңызар.
Жансұлтан Нұрмұханов, еліміздегі ең жас директорлардың бірі, «Болашақ» бағдарламасы аясында оқып келген маман:
Менің еңбек жолым 2015 жылдан басталды. Алғаш колледжден бастап, Ақтаудағы Назарбаев мектебінде 3 жыл қызмет атқардым. Кейін 1 жылдай Орал қаласында аграрлық-техникалық университетінде жұмыс жасап, қазіргі таңда Сырым ауданы, Қособа ауылының мектеп-бөбекжай балабақша кешенінің директоры қызметін атқарамын.Болашаққа деген сенімділік пен нық мақсаттарымның арқасында осындай жетістікке жетіп отырмын деп ойлаймын. Жастарға айтарым алға мақсат қоя білу керек және сол мақсатқа жетуге күш беретін мотивация табу керек. Мен өзім «Болашақ» бағдарламасымен бітіріп келген жас мамандарды үлгі етіп, содан өз арманыма жеттім. «Ұлтқа қызмет ету білімнен емес, мінезден» екенін ұмытпағайсыздар.
Атап өтетін жайт, Орал қаласы Қазақстан бойынша NEET санатындағы жастар санынан соңғы орында. Белсенділігі төмен жастармен осындай шаралар өткізу арқылы осы санаттағы жастар санын азайту жоспарға алынған. Жастарды әлеуметтендіріп, білім мен еңбекке баулитын шаралар еліміздің барша облыстарында өткізілмек.