Павлодар облысында жолды өз бетінше жөндегені үшін лауазымды тұлғаға әкімшілік айыппұл салынды, – деп хабарлайды kazlenta.kz тілшісі Polisia.kz сайтына сілтеме жасап.
Жалпыға ортақ пайдаланылатын жолдар қалалық инфрақұрылымның бөлігі болып табылады және логистика мен жалпы қоғам өмірі үшін өте маңызды. Жаңа жолдар салу немесе ескі кенептерді жөндеу заңнамаға сәйкес жүргізілуі керек.
Жолдардың бүліну фактілеріне тұтастықтың бұзылуы немесе жол жамылғысының ластануы жатады. Мәселен, 2024 жылғы 27 қыркүйекте сағат 18:00 шамасында қаланың көше-жол желісіне тексеру жүргізу кезінде Екібастұз қаласы Мәметова көшесі мекенжайында перзентхананың аумағында және жанында жол жөндеу жұмыстарын заңсыз жүргізу фактісі анықталды.
– Жұмыстарды заңсыз жүргізу кезінде су құбыры бүлініп, перзентхана біраз уақыт сусыз қалды. Қаланың төтенше жағдайлар қызметінің арқасында жағдай дереу түзетілді. Жөндеу жұмыстарын орындаған ЖШС басшысы тиісті рұқсатсыз Қазақстан Республикасының жол қозғалысы саласындағы заңнамасында белгіленген жолдарда жұмыстар жүргізу жөніндегі талаптарды орындамағаны үшін әкімшілік жауапкершілікке тартылды, лауазымды адамға 10 АЕК мөлшерінде айыппұл салынды, – дейді Екібастұз қаласы ПБ бастығы Нұрғазы Жәмшитов.
Мұндай жазаны болдырмау үшін жөндеу немесе басқа жұмыстарды жүргізу мәселелерін дұрыс келісу маңызды. Яғни арнайы рұқсатсыз көліктер мен жаяу жүргіншілердің қозғалысына кедергі келтіретін жұмыстарды жүргізуге болмайды.
– Қазуды, қоршауларды және айналма жолдарды ұйымдастыру жөніндегі схемалар жергілікті атқарушы органдармен, ал жол қозғалысы қауіпсіздігі Екібастұз қаласы ПБ әкімшілік полициясымен бекітілуі және келісілуі тиіс, – деп қосты спикер.
2024 жылдың 9 айында жолдарда жұмыстарды жүргізу, жолдарды күтіп ұстау және басқа да жол құрылыстары бойынша талаптарды орындамағаны үшін 19 бұзушылық анықталды.