Атырау облысында мұнай айдау стансасының маңында 20 гектар жер өртенді, деп хабарлайды kazlenta.kz тілшісі ҚазАқпарат сайтына сілтеме жасап.
Атырау облыстық төтенше жағдайлар департаментінің қоғаммен байланыс тобынан мәлім еткендей, өрт Индер ауданында тұтанған.
«Елтай ауылының маңында мұнай айдау стансасы бар. Аталған маңындағы дала шөбі жанып, 20 гектар аумаққа жайылды. Жалынды сөндіруге төтенше жағдайлар департаментінің 9 қызметкері мен ерікті өрт сөндіру жасағынан 14 адам, 3 өрт сөндіру машинасы, 1 су таситын көлік, 1 трактор тартылды», - деп хабарлады департаменттің қоғаммен байланыс тобы.
Еске сала кетелік, бұдан бұрын Атырау облысында жыл басынан 1,2 мың га орман алқабы өртенгенін хабарлаған болатынбыз.
Облыстық төтенше жағдайлар департаментінің қоғаммен байланыс тобынан мәлім еткендей, былтыр 7 орман өрті тіркелген.
«Биыл Атырау облысының орман қорындағы 1246 гектарды шарпыған 3 өрт оқиғасы тіркелді. Бұл былтырғы көрсеткішпен салыстырғанда 42 есе төмен. Ал тұрғындар тарапынан абаттандыру, қураған шөптерді өртеу кезінде отты қараусыз қалдыру салдарынан шабындық жерлерде, ашық алаңдарда, автожол бойы мен канал жағалауында 91 гектар аумақ жанып кетті», - деп мәлім етті қоғаммен байланыс тобынан.
Құтқарушылар облыс тұрғындары мен қонақтары өрт қауіпсіздігі ережесін қатаң сақтауды сұрап отыр.
Біріншіден, шабындық, егістік, орман алқаптарында қураған шөптерді, қоқыстарды өртеп, бақылаусыз қалдыруға жол берілмеуі керек.
Екіншіден, ауа райы құрғақ, ыстық және қатты жел кезінде от жақпаған жөн.
Үшіншіден, табиғат аясындағы демалыс аяқталған кезде жанған отты су құйып, құм немесе топырақ сеуіп, толық өшкеніне көз жеткізген дұрыс. Ең бастысы, өртті өз күшімен сөндіру мүмкін болмаса, 101, 112 нөмірлері арқылы хабарлау қажет.