Былтырғы қаңтар–қараша айларында республикада 13,4 мың жол-көлік оқиғасы тіркелді, бұл бір жыл бұрынғыдан 9,2% көп. Оның ішінде 1,7 мыңы (немесе 13%-ы) кісі өлімімен аяқталды, деп хабарлайды ranking.kz-ке сілтеме жасаған kazlenta.kz
Тіркелген құқық бұзушылықтардың жалпы санының 11,6 мыңы көлік жүргізушілерінің кінәсінен, 378 дерек жаяу жүргіншілердің кінәсінен, үш дерек коммуналдық қызметтердің кінәсінен, бір дерек жол қызметі мен мердігерлердің кінәсінен болған.
Қазақстанда ЖКО ең көп болатын күн — дүйсенбі. ЖКО сенбі және сейсенбі күндері де жиі болады. Ең аз болатын күн — бейсенбі.
Еліміздегі барлық жол-көлік оқиғаларының 68%-ы күндіз, 19%-ы ымыртта, 12%-ы түнде болған.
Ең көп тіркелген ЖКО жаяу жүргіншілерге соқтығысуға қатысты: 5 мың оқиға. Одан кейін көліктердің соқтығысуы (3,2 мың) және аударылу (1,2 мың) жағдайлары. Бұлардан кейін ең көп болатын оқиғалар кедергілерге соғылу (514) және жолаушылардың құлауы (339) жағдайлары.
Өңірлер бойынша жазатайым оқиғалардың ең көбі Алматыда тіркелді: 3,5 мың ЖКО, бір жылда 20,6% көбейген. Одан кейін дәстүрлі түрде Алматы (1,9 мың жағдай, 8,2% азайған) және Жамбыл (1,4 мың, 21,9% көбейген) облыстары.
Ең аз жазатайым оқиғалар жаңадан құрылған облыстар — Ұлытау, Абай және Жетісу облыстарында (тиісінше 33, 94 және 226 жағдай) тіркелді. Еске салайық, бұл өңірлер 2022 жылдың ортасында ғана құрылғандықтан, көрсеткіш төмен болып отыр.
Кісі өліміне әкеп соққан жағдайлар көбіне Түркістан облысында болды: жалпы ЖКО санының 37%-ы. Одан кейін Қарағанды (33,9%), Ұлытау (33,3%), Абай (29,8%) және Қызылорда (23,4%) облыстарында. ЖКО салдарынан кісі өлімі тіркелу көрсеткіші ең аз Алматы (бар болғаны 2,4%) мен Астана (3,5%), сондай-ақ Жамбыл облысында (10,1%) тіркелген.
2022 жылдың қаңтар–қараша айларында елде жол-көлік оқиғаларынан 19,5 мың адам зардап шекті, бұл бір жыл бұрынғыдан 9% артық. Олардың ішінде жараланғандар саны 17,3 мың, қаза тапқандар — 2,2 мың адам. Оның ішінде 9,6 мың ер адам, 7,7 мың әйел жарақат алды, 1,7 мың ер адам және 568 әйел қаза тапты.
Өңірлер бойынша жол-көлік оқиғаларынан ең көп зардап шеккендер Алматы (4,1 мың адам), сондай-ақ Алматы облысы (3,1 мың адам) және Жамбыл (2,3 мың адам) облыстарында тіркелді.
Жедел медицина ұлттық үйлестіру орталығының жедел деректеріне сәйкес, 2023 жылдың алғашқы 3 күнінде ҚР жолдарында және жедел қызмет көрсететін аймақтарда ЖКО салдарынан 116 адам зардап шекті. Оның 26-сы бала, 3-і жүкті әйел. 76 адам ауруханаға жеткізілді, 9 адам қайтыс болды, деп хабарлады ҚР ДСМ.