Президент Қасым Жомарт Тоқаевтың биылғы жолдауда басымдық берген бағыттарының бірі- кәсіпкерлік саласын дамыту мәселесі болатын. Ел экономикасының тұрақты әрі стратегиялық дамуы үшін шағын және орта бизнес өкілдерін барынша қолдау қажет.
Бүгінде істі ілгерілетуге мемлекеттен берілетін жәрдем де оң ықпал етіп отыр. Еліміздегі үшінші мегаполис Шымкентте- 130 мыңнан аса шағын және орта кәсіпкерлік нысаны белсенді жұмыс істеп тұр. Қаладағы кәсіпкерлік нысандарда жұмыспен қамтылғандар саны 218,2 мың адамға жеткен. Шағын және орта кәсіпкерлік бағытында өндірілген өнімнің көлемі 2023 жылдың жартыжылдығында 1,1 трлн теңгені құраған. Бұл өткен жылмен салыстырғанда 32,9 пайызға артты. Бұл туралы Шымкент қалалық кәсіпкерлік және индустриалды-инновациялық даму басқармасы басшысының орынбасары Ермек Тұрманов журналистерге өткізген баспасөз мәслихатында мәлім етті.
Шағын кәсіпкерлікті қолдау үшін мемлекеттік бағдарлама аясында 2023 жылға 21,7 млрд теңге қаржы бөлінген. Жыл басынан бері 18,3 млрд теңгеге 3 592 жобаға қолдау көрсетілді. Биыл «Кәсіпкерлікті дамыту жөніндегі 2021 – 2025 жылдарға арналған Ұлттық жобасы» шеңберінде 20,4 млрд теңге қаралып, қазіргі сәтте 3 351 жобаға 16,3 млрд теңгенің қолдауы көрсетіліпті.
Кәсіпкерлікті дамыту жөнінде «Іскер қала» бағдарламасы аясында биыл 1,3 млрд теңге бөлінген екен. Бүгінге дейін аталған бағдарлама аясында шеңберінде 241 жобаға қолдау көрсетіліпті. Оның 215-сі шағын несиелендірілсе, 26 жобада өндірістік алаңдардың жалдау ақысын өтеп берген.