Президенттің ұсынысын Қорғаныс министрі Руслан Жақсылықов оқып берді.
"Конституцияның 53-бабының 5-тармақшасына сәйкес, жалпы саны 430 әскери қызметшіден тұратын Қазақстан Қарулы күштерінің бітімгершілік контингентін Орталық Африка республикасындағы БҰҰ-ның көп профильді біріктірілген тұрақтандыру миссиясына, Конго демократиялық республикасындағы БҰҰ тұрақтандыру жөніндегі миссиясына, Малидегі БҰҰ-ның көп профильді біріктірілген тұрақтандыру жөніндегі миссиясына, Ливандағы БҰҰ уақытша күштерінің миссиясына қатысуға жіберу туралы ұсыныс енгіземін", - делінген президен ұсынымында.
Министрдің айтуынша, бағалау мен іріктеу бірнеше кезеңнен тұратын болады. Қорғаныс ведомствосы Қазақстаннан БҰҰ-ға бес бөлімшенің қатысуына өтінім берген. "Олардың дайындық деңгейі әртүрлі. Біз бөлімшелерімізді бірден емес, сұраныс бойынша жіберіп отырамыз. Онда миссияны орындауға дайындығымыз бағаланады", - деді министр.
Депутаттар мемлекет басшысының ұсынысын қолдады. Айта кетейік, парламент палаталарының бірлескен отырысына сенаттың 45 депутаты мен мәжілістің 103 депутаты қатысуда. Бүгінгі таңда Батыс Сахарадағы БҰҰ миссияларында 6 әскери, ал Ливандағы БҰҰ Уақытша күштерінің миссияларында сәйкесінше 9 қазақстандық әскери қызметші қызмет етуде.