Финляндия тарапының бастамасымен Қазақстан Премьер-Министрінің орынбасары - Сыртқы істер министрі Мұхтар Тілеубердінің Финляндия Республикасының Сыртқы істер министрі Пекка Хаавистомен телефон арқылы сөйлесуі өтті, деп хабарлайды kazlenta.kz.
Тараптар саяси, сауда-экономикалық және мәдени-гуманитарлық салалардағы екіжақты ынтымақтастықтың өзекті мәселелерін талқылап, халықаралық қауіпсіздік пен климатты қорғау мәселелерін шешу тәсілдерінің іспеттестіктерін атап өтті.
БҰҰ және ЕҚЫҰ алаңдарында тараптардың өзара іс-қимылының жоспарлары айқындалды. Қазақстанда 2022 жылдың басында орын алған қаңтардағы оқиғаларды талқылай отырып, М.Тілеуберді Қазақстанның адам құқықтарын қорғау саласындағы міндеттемелеріне бейілділігін қайта растады және екі елдің БҰҰ Адам құқықтары жөніндегі кеңесіне қазіргі мүшелігі шеңберінде ашық диалогқа дайындығын білдірді.
Сұхбат соңында министрлер 2022 жылы Қазақстан мен Финляндия арасындағы дипломатиялық қатынастардың 30 жылдығына орай бірқатар іс-шаралар өткізуге уағдаласты.