Дзюдодан Қазақстан командасының бас бапкері Ғалымжан Жылгелдиев спортшылардың Олимпиадаға дайындығын жоғары екенін айтты. Бас бапкер ең бастысы психологиялық тұрғыдан дайын болу керек деп есептейді.
"Олимпиада төрт жылда, біздің жағдайымызда бес жылда бір өтетін жарыс. Сол себепті, спортшылар психологиялық тұрғыда дайын болуы керек. Біздің балуандар дайын. Өйткені, осы жарысқа қатысу үшін қаншама қиындықтарды артта қалдырды.
Пандемия кезінде жаттығу жасаудың өзі оңайға соққан жоқ. Десе де, біз өзімізге қажетті рейтингілік ұпайларды еншіледік. Әлем чемпионы болсаң да, Олимпиада чемпионы болсаң да, жеңіске ең мықты спортшы жетеді.
Кейбіреулер үшін бұл өз мансабындағы соңғы Олимпиада болуы мүмкін. Өйткені, спорт мәңгілік емес. Сондықтан, біздің олимпиадалық командамыздағы әр спортшы жақсы өнер көрсетсе екен деген тілегім бар.
Спортшылардың барлығы жарысқа дайын", - дейді ол.