Велоспорттан Қазақстан командасының бас бапкері Асан Базаев Токио Олимпиадасындағы жарыс жолына баға беріп, қазақстандық велошабандоздардың дайындығына баға берді.
«Алексей Луценко қазір нағыз бабында. «Тур де Франс» додасында алғашқы жетілікке енді. Аталған жарыстан соң Дмитрий Груздев де жақсы бабына енді. Вадим Пронский соңғы екі аптада биік тауда жаттығу өткізді, өзін өте жақсы сезінуде. Олардың ең негізгі міндеті – Алексейдің соңғы елу шақырымда алға басуына мейілінше жағдай жасау.
Жарыс өте қиын өтеді. Оның үстіне, күн райы да 32 градустан жоғары болмақ. Жаңбыр мен ылғалдылық да жағдайды қиындата түседі. Десе де, Алексейдің мүмкіндігі жоғары деп есептеймін. Әрине, оның үстіне велоспорттағы топтық жарыстың лотерея тәрізді екенін де ұмытпаған жөн. Ең мықты деген спортшылардың өзі жүлдесіз қалуы мүмкін.
Жалпы, рельеф бойынша жарыс Луценконың ыңғайына келеді. Тек 115-ші шақырымда басталатын 15 шақырымдық тау жолы қиындық туғызатыны рас. Одан кейінгі биік жерлер алты шақырымнан аспайды. «Тур де Франс» кезінде де Алексей таулы жерде қиналды. Дегенмен, биылғы маусымда ол таулы жерде жарысудан көп тәжірибе жинады. Ендігі ойымыз – Алексейдің жеңіске жетуіне үлес қосу», - дейді Базаев.
Велоспортшылар жарысы 24 шілдеде басталады.