«Сарыарқа» ауданы ПБ қызметкерлері жедел-іздестіру іс-шараларын жүргізу барысында алаяқтық жолмен заңсыз ақша қаражатын иемденді деген күдікпен 59 жастағы қала тұрғынын анықтады, деп хабарлайды kazlenta.kz тілшісі Астана қаласы ПД баспасөз қызметіне сілтеме жасап.
Тергеу барысында анықталғанындай, әйел ортақ таныстары арқылы жәбірленушімен танысқан. Банкте қызмет ететін жақын туыстарым бар деген сылтаумен әйелдің сеніміне кірген алаяқ, тиімді шарттармен несие алып беруді ұсынған. Өзінің қызметі үшін жәбірленушіден 500 мың теңге көлемінде ақша қаражатын алып, төмен пайызбен несие алып беруге уәде берген. Алайда, кейін әртүрлі сылтаулар айтып, уәдесін орындамай хабарсыз кеткен. Алаяққа алданып қалғанын түсінген жәбірленуші полицияға жүгінген.
Аталған факті бойынша сотқа дейінгі тергеу амалдары жүргізілуде. Әйел кінәсін мойындады, оның елорда аумағында жасалған осыған ұқсас басқа да қылмыстарға қатыстылығы тексерілуде.
Астана қаласының полиция департаменті азаматтарға сақ болуды, бейтаныс адамдарға сенбеуді ескертеді.