2022 жылғы 22-23 желтоқсанда ҚР Цифрлық даму, инновациялар және аэроғарыш өнеркәсібі министрлігі (ҚР ЦДИАӨМ) 5G-ге радиожиілік жолағын тағайындауға аукцион ұйымдастырды, деп хабарлайды finprom.kz-ке сілтеме жасаған kazlenta.kz
Аукциондар gosreestr.kz ақпараттық жүйесінің сайтында өтті. Бірінші лот 3600–3700 МГц (100 МГц) радиожиілік диапазонында, екіншісі 3700–3800 МГц (100 МГц) диапазонында ұсынылды. Әр лоттың бастапқы бағасы 1,761 млрд теңгені құрады.
Нәтижесінде № 1 лоттың бағасы 62,7 млрд теңгеге дейін өсті, ал № 2 лот бойынша ұсыныс рекордтық 93,4 млрд теңгені құрады. Осылайша, екі лот бойынша аукцион қорытындысының сомасы 156,1 млрд теңгені құрады.
ҚР ЦДИАӨМ мәлімдегендей, 2022–2025 жылдары Қазақстанда «Цифрландыру, ғылым және инновациялар арқылы технологиялық серпіліс» Ұлт жоспарына сәйкес 5G желілерін енгізу жоспарлануда. Бұл ретте радиожиіліктердің ұлттық ресурсы шектеулі, сондықтан бесінші буынның 5G/IMT ұялы байланысын енгізу және дамыту үшін РЖС жолақтарын таратуды тендер арқылы жүзеге асыру туралы шешім қабылданды.
Сонымен қатар, егер әлемнің басқа елдерімен салыстырғанда ұқсас параметрлер бойынша қарастыратын болсақ, Қазақстандағы екі лоттың соңғы бағасы айтарлықтай жоғары болғанын атап өтуге болады.
Осылайша, ҚР-да екі лоттың қорытындысы бойынша түпкілікті сома 156,1 млрд теңгені немесе 338,7 млн АҚШ долларын құрады. Өз кезегінде, Чехияда 2020 жылы ұқсас параметрлер бойынша сома бар болғаны 45 миллион АҚШ долларын құрады, бұл ҚР-дан 7,5 есе аз.
Осыған ұқсас параметрлер бойынша Хорватия мен Швецияның тәжірибесін де атап өтуге болады. Мысалы, 2021 жылы Хорватияда 3600 МГц радиожиілігіне жалпы сомасы 56 млн АҚШ доллары төленді, ал Швецияда 3700 МГц радиожиілігін 228 млн АҚШ долларына сатып алды. Толығырақ ақпарат төмендегі кестеде берілген.
Осылайша, біз 5G желісіндегі радиожиілік ақысының ақырғы сомаларында айтарлықтай айырмашылықты көріп отырмыз. Бұл сәйкессіздіктің себептері неде деген сұрақтың жауабы жоқ.
Жалпы, ҚР-дағы смартфондардың тек 6%-ы ғана 5G ұстайтынын бұған дейін жазған болатынбыз. Бұл абоненттердің бұл желіні пайдалануға дайын еместігін көрсетеді.