Ведомстволық сайттың мәліметінше, ШҚО бойынша Қылмыстық-атқару жүйесі департаментінің №73 мекемесіне 38 жастағы Өскемен тұрғыны сәлемдемемен келген. Ол әкелген сәлемдеме үш келі бауырсақ болған. Тексеру кезінде олардың жетеуінен белгілі бір иісі бар белгісіз жасыл түсті заттар табылған. Тыйым салынған заттар апелляциялық соттың шешімін күтіп отырған азаматқа арналғаны белгілі болған. Ол тонау бойынша тергеуге алынған. Сараптама нәтижесінде аталған зат есірткі, яғни кептірілген марихуана екені анықталған.
"Тергеудегі және сотталған адамдармен жүргізілетін профилактикалық әңгімелесулерге қарамастан, олардың туыстары тыйым салынған заттарды мекемеге кіргізуге тырысады. Қызметкерлердің қырағылығының арқасында мұндай деректердің алдын аламыз. Аталған факті бойынша қызметтік тергеу жүргізіліп жатыр", – дейді №73 мекеменің бастығы Тілеуберген Көнекбаев.