Ұлыбританияның денсаулық сақтау қауіпсіздігі агенттігінің атқарушы директоры Дженни Харрис елде бір аптада коронавирус жұқтырғандар саны 32 пайызға өскенін айтты. Өткен аптада қауіпті инфекцияға шалдыққандар санының шамамен 500 мыңға артуы Omicron-ның BA.4 және BA.5 деп аталатын екі түрінің жылдам таралуына байланысты. 30 маусымда Англияда вирус жұқтырып, ауруханада төсек тартқандар саны шамамен 9 мың адам болған. Бұл ай басындағы көрсеткіштен екі есе көп.
Жалпы Англияда коронавирус анықталған тұрғындар саны 1 829 100 адамға жеткен. Бұл халықтың 3,35%-ын құрап отыр. Уэльсте бұл көрсеткіш 106 мың болды, бұл халықтың 3,49% немесе шамамен 30 адамның бірін құрайды. Солтүстік Ирландияда тест тапсырғандардың ішіндегі 71 мың адамнан вирус анықталған.